Zazaca Zazaki Zazakî Dimiki, Kirdki, Kirmanci Kurdî, zazalar Zaza

Kuçeyanê Amedî de vengê tifingan: Camêrdo 60 serre merd

Mon, 07 Sep 2026 16:27:00 +0300

Hedîse Taxa Şehitlikî ya qezaya Yenişehirî de qewimîya. Goreyê malumatanê ke ameyî girewtiş, Kadri B. Wexto ke kuçe ra rayra şîyêne, raştê hêrişê kes yan zî kesanê ke nasnameyê înan nêzanîyeno ame. Şarê dormeyî vengê sîlehan hesna û xeber da; ser o ekîbê weşîye û polîsî ameyî cayê serebûtî.

Cayê serebûtî de dinyaya xo vurna

Kontrolanê ekîbanê weşîye ra pey bewlî bi ke Kadri B.yo 60 serre uca de dinyaya xo vurnayo.

Polîsan seba tepiştişê kes yan zî kesanê hêrişkeran xebate da dest pêkerdene

Şiwana Dêrsîmî Ozlem Baloğlu emser karê xo kena

Mon, 07 Sep 2026 16:08:00 +0300

Özlem Baloğlu ya ke maya di domanan a û Zozanê Ferhat yê qezaya Pilemurîye ya Dêrsimî de şîwanîye kena, vera şertanê gureyî yê giranen zî fek xeyalê xo ra veranêdana. Baloğlu da zanayene ke badê şîwanîye zî wazena biba cinîya teşebuskare, wina va: "Ez wazena karê xo bi xo bikera. Karê ke ez eşkena seba xo bikera, ez çi ra seba yewna kesî bikera?"

Baloğluya ke emser reya verêne ya ke dest bi şîwanîye kerda, hetêk ra miqatê mîyan bena, înan doşena, penîr virazena û karê pakîye kena.

Özlem Baloğluya da zanayene ke sey cinîyêke karê yewna kesî kerdene û va: "Mi emser dest bi şîwanîye kerdo. Ez şîwanîye kena, mîyan doşena, penîr ey virazena, firaqanê şuwena. Ez nê karî reya verêne ya ke kena. Cinîyî bi raştî yenê pelixnayîş. Ti her çi hende rind zî bikerî, wexto ke ti karê yewna kesî de bixebitîyî ti nêşenî xo weş bimojnî. Ti her çi pak virazenî labelê eke karê yewna kesî bi, zaf giran beno. Ez wazena badê şîwanîye zî biba cinîya teşebukare û karê xo bikera. Ez wazena karê xo bi xo bikera. Karê ke ez eşkena seba xo bikera, ez çi ra seba yewna kesî bikera?

Dîyarbekir de 33 normê mamosteyanê Kurdî abîyê

Sat, 05 Sep 2026 17:47:00 +0300

Semedê teyînkerdişanê mamosteyanê vêşê norman sîstemê e Mebbis ra normê mamosteyan eşkera bîyê. Dîyarbekir de çende normê Kurdî (Kurmancî û Zazakî) newe abîyê, ê zî eşkera bîyê.

qezayanê Dîyabekir de 10 normê Kurmancî abîyê û 3 zî normê Zazakî abîyê.

Qezeyanê bînan de 17 normê Kurmancî abîyê û 3 zî normê Zazakî abîyê.
Çende norman de xeletîye est a cayê normê Kurmancî de normê Zazakî abîyê û cayê normê Zazakî de zî normê Kurmancî abîyê.

Amed de otomobîl da tutêk ro: Gedeyo 8 serre merd

Sat, 05 Sep 2026 16:14:00 +0300

Goreyê melumatê ke ameyê girewtene, Taxa Akpınarî de wexto ke Muhammed Ramadan (8) waştêne bivêro wever, otomobîl da piro û birîndar bi.

Xeberdayîşî ser o polîs û ekîbê weşîye şawîyayî cayê qeza. Gedeyo ke giran birîndar bi, badê mudaxeleyo verêne wedarîya nêweşxane la heme mudaxeleyan ra pey nêame xelasnayîş û dinyaya xo bedilna.

Derheqê qeza de tehqîqat ame dest pêkerdene.

Koyê Qerejdaxî de wextê arêdayîşê firingîyan

Sat, 05 Sep 2026 12:44:00 +0300

Firingîyê ke mintiqaya Koyê Qerejdaxî de yenê çînayîş, badê huşkkerdişî şinê sifrêyanê mîyanneteweyîyan. Citkarê mintiqa firingîyan şawenê fabrîqayanê Îzmîr, Manîsa û Turgutluyî. Citkarî vanê ke mehsulê înan verê cû reseno fabrîqayan û uca ra zî sey "zerdo sûr" şawîyeno Ewropa, Rûsya û Amerîka. Nê firingî zafane lokantayanê pîlan de seba sosanê hamburger û pîzzayan yenê xebitnayîş. Serranê peyênan de mehsulê firingîyan zaf zêdîya û no kar seba citkaranê Dîyarbekir, Mêrdîn û Riha bi çimeyêko debarî yo.

8 lîreyî gênê 180 lîreyî ra roşenê

Citkar Remezan Çelîkî da zanayîş ke firingîyê ke înan bi ercêko kêmî roşenê, badê bi erco berz yenê rotiş û va: "Ma yew kîlo firingî bi 8 lîreyan roşenê. Bazirganî gênê, kenê huşk û dima ra bi 140, 160 yan zî 180 lîreyan ra roşenê. Firingîyan kenê huşk û şawenê Ewropa û Rûsya."

Amedspor hewteyo çarin de Stenbol de yo: Bîletê rotiş de yê

Fri, 04 Sep 2026 15:46:00 +0300

Amedsporo ke hewteyo çarin yê Lîga Supere ya Tirkîya de do bibo mêmanê Kasımpaşayî, seba terefdaranê ey bîletê maçî vejîyayî rotiş. Maç do 6ê êlule saeta 17.00î de Stadyumê Recep Tayyip Erdoğanî de bêro kaykerdiş. Pawîyeno ke xeylê terefdarê Amedsporî yê ke Stenbol de yê bêrê maç û paştî bidê taximê xo.

Hadrekarîya maçî dewam kena

Amedsporo ke hewteyo hîrêyin de bi netîceya 2-1î Trabzonspor mexlub kerd, vera Kasımpaşayî hazirîyanê xo rê dewam keno. Kaykerê taximî Tesîsê Şehmus Özerî de antrenmananê xo kenê. Amedspor wazeno ke Stenbol ra zî bi serkewtiş ageyro.

Çewlîg de wesayît firr da dere: Yew kes merd, çar kesî birîndar bîy

Fri, 04 Sep 2026 15:10:00 +0300

Qeza, qezaya Çêrme ya Çewlîgî de bîye. Goreyê agahîyanê ke ameyî girewtene, şofêrî kontrole wesayîtî kerd vîndî û wesayît kewt dere. Şarê dormeyî xeber da û ekîbê weşîye, AFAD û cendirmeyî ameyî cayê qeza.

Wesayît de 5 kesî estbîy; vajîya nînan ra yew kesî dinyaya xo bedilna û çar kesê birîndarî bi ambulans wedarîyay nêweşxane.

Derheqê qeza de tehqîqat ame dest pêkerdene.

Xarpêt de şewat: Adir kewt daristanî

Thu, 03 Sep 2026 13:26:00 +0300

Goreyê malumatanê ke ameyî girewtene, dorûverê dewa Hamzalî ya qezaya Depe de erdê bejî de bi sebebêko nêzanaye ra şewat vejîya. Kilî bi tesîrê vayî gird bîy û resa daristan.

Xeberdayîşî ser o hetê Mudirîya Mintiqa ya Daristanî ra mintiqa rê 6 erazozî, 2 wesayîtê mudaxeleya verêne, 3 pîqapî, 6 xebatkarê teknîkî, 10 memurê pawitişî û 45 karkerê daristanan ameyî şawitene. Zaf ekîbê itfaiye û cendirmeyan zî sewqê mintiqa bîy; ame zanayene ke seba hewnakerdişê adirî xebatî dewam kenê.

Karkero ke nêeşka heqê xo bigîro waşt xo bikişo

Wed, 02 Sep 2026 18:33:00 +0300

Dîyarbekir de karkero ke nêeşka heqê xo bigîro, vejîya qatê peyên ê înşaatî û waşt xo bikişo; dima ke temînatê perê xo girewt, ame war.

Hedîse qezaya Baglarî de qewimîya. Karkero ke va bi wextêko derg o ez nêeşkena heqê xo bigîrî, vejîya serê înşaatî. Xeberwesnayîş ser ekîbê weşîye yê 112î, îtfaîye û polîsî ameyî cayê hedîseyî. Ekîbanê îtfaîye binê binaye de çadire akerd.

Dima ke sozê dayîşê heqê ci ame dayene, karker razî bi û ame war. Polîsan karker seba îfadeyî berd qereqol.

VÎDEO- Nê zî pêzkovîyê Xarpêtî yê

Wed, 02 Sep 2026 10:51:00 +0300

Qezaya Xarpêtî Mîyaran de qefleyêk pezkovîyan ame vînayîş. Nê pezkovîyî hetê Ridvan Gülerî rap ê telefonê destî ameyî qeydkerdiş.

Demo peyên de welatê ma de humara pezkovîyan zêdîyaya û seydwanîya înan zî qedexe ya, binê pawitişî de yê.

Serkewtişo pîl: Amedspor 2-1 Trabzonspor

Tue, 01 Sep 2026 10:33:00 +0300

Maço peyên yê nê hewteyî de Amedspor verê hezaran hetgiranê xo de vejîya meydan. Nêmeyê verên ê maçî 1-1 qedîya. Deqa 90ine de bi gola Gift Orbanî, Amedspor 2-1 verba Trabzonsporî kewt vernî û maç bi no hewa qedîya. Bi nê serkewtişî taximê kesk û sûre puanê xo kerd 6 û lîge de vejîya rêza 5îne.

Raqîbo newe Kasımpaşa yo

Amedspor hewteyo 4ine yê Lîga Supere de do şêro deplasmanê Kasımpaşa. Maç 6ê êlule roja yewşemeyî saete 17.00 de Stadyumê Recep Tayyip Erdoğani de yeno kaykerdene. Ekîba Amedî wazena ke no deplasman ra zî bi serkewtiş ageyro

Cigêrayîş: Hîrê ra yewê kurdan paştî danê Amedsporî

Mon, 31 Aug 2026 19:28:00 +0300

Enwer Yilmaz

Goreyê cigêrayîşê Merkezê Cigêrayîşan ê Kurdî (KSC) û Merkezê Cigêrayîşan ê Rawestî, mîyanê 4 serran de hûmara terefdaranê Amedsporî 4 qatî zêde bî û 1 mîlyonî ra resa 4 mîlyon kesan.

Cigêrayîşê bi nameyê "Kurdan de hetgirîya Amedsporî" 19 bajaran de bi pêvînayîşê rî bi rî yê 1471 kurdan reyde virazîya. Na xebate mojna ke Amedspor seba kurdan tena taximêkê sporî nîyo, sembolêkê nasnameyî yo.

Hîrê ra yewê kurdan paştî danê Amedsporî

Goreyê cigêyaîşî, Tirkîya û Bakur de hîrê ra yewê nifûsê kurdan ke texmînen 12 mîlyon û nêm o, terefdarîya Amedsporî keno. Se ra 9ê beşdaran Amedsporî sey "taximê xo yo verên", se ra 23 zî sey "taximê xo yo diyîne" vînenê. No zî mojneno kehetgirê Amedsporî resay 4 mîlyon kesan.

Kay ra zêdêr sembolê nasnameyî yo

Tena se ra 24ê beşdaran Amedsporî tena sey "taximê futbolî" vînenê. Se ra 38ê înan zî taximî sey "nîşaneyê nasnameyî" û se ra 8 zî sey "hem taximê futbolî hem zî temsîlkarê nasnameyî" name kenê. Sebebê bingeyên ê eleqeyî serkewtişê sporî nîyo; hîsê aîdîyet û nasnameyî yo.

Ziwan û kultur

Cigêrayîş nîşan da ke qiseykerdişê kurdkî çiqas aver şiro, terefdarîya Amedsporî zî hende zêde bena. Amedspor lîsteya taximanê ke kurd tewr zaf heskenê de 10 ser ra bi 5,9 puanan rêza verêne de yo. Dima Amedsporî bi 4,4 puanan Galatasaray û bi 4,1 puanan Batman Petrolspor yenê.

Tehqîqatê Gulistan Doku: Yewna polîso bîn ame tewqîfkerdiş

Mon, 31 Aug 2026 15:28:00 +0300

Operasyonê tehqîqatî de 10 şikdarê ke ameybî dest bendkerdene ra îfadeyê 3 kesan emnîyet de qedîya. Kontrolê weşîye ra dima her hîrê kesî berdî Edlîyeya Erziromî û dozgerî bi waştişê tewqîfkerdişî her hîrê şikdarî sewqê mehkema kerdî.

Mehkema qerarê tewqîfkerdişî da polîso bi nameyê Gurkan Gurdalî. Şikdarê bînî A.K. û V.İ. bi şertê kontrolê edlî serbest ameyî verdayene. Sersavcîtîye vera serbestverdayîşê her di polîsan îtîraz kerd. Îfadeyê 7 şikdaranê bînan ê ke nezaretxane de yê zî dewam kenê.

Amedspor emşo Trabzonspor keno mêman

Mon, 31 Aug 2026 14:05:00 +0300

Lîga Supere de Trabzonsporo ke hewteyo verên 4 puanî û Amedsporo ke 3 puanî arê daybî, emşo seba serkewtişî kay kenê. Her di taximan zî di maçanê verênan de 3 golî eştî qeleya raqîban û qeleya xo de zî 2 golî dîyî.

Trabzonspor bi 1 serkewtiş û 1 pîyayî4 puanan reyde rêza 8ine de yo. Sezona xo ya verêne ya Lîga Supere de Amedspor zî bi 1 serkewtiş û 1 mexlubîyet 3 puanî reyde rêza 12ine de ca gêno.

Maço verên de Amedsporî pê kayêko weş Erzurumspor 3-0 kerd mexlub û wîna dest bi lîge kerd, labelê hewteyo diyîn de bi mexlubîyetê deplasmanî terefdarê xo xemgîn kerdî. Ekîba kesk û sûre wazena ke ewro vera Trabzonsporî ser bikewo.

Adir kewt salona sporî: 3 cînî merdî

Mon, 31 Aug 2026 12:54:00 +0300

Mehleya Gültepeyî ya Batmanî de vizêr şewat vejîya û Şanziment Sarıoğlu (44), Emine Yağri (42) û Av. Gülsüm Öztekin Tunç (27) merdî, 9 kesî birîndar bîyî.

Derheqê şewatî de hetê Soerdozgerîya Komare ya Batmanî ra tehqîqat dîya dest pêkerdiş.

Çarçiwaya tehqîqatî de wayîrê salona sporî û hîrê xebatkarê kargehî ameyî tepiştiş û îfadeyê înan yeno girewtiş.

Cayê ke Tede Zazakî Tewr Zêde Yena Qiseykerdiş

Thu, 27 Aug 2026 10:00:00 +0300

FIRAT ŞÎN

Zazakî, ziwano ke tewr zêde Tirkîya de, mintiqaya Anatolya Mîyanêne û Rojhelatî de yeno qiseykerdiş. Na lehçeya ke sey kirdkî, dimilkî yan zî dimilî zî yena namekerdiş, bi taybetî çend bajaran de hîna zaf qisey bena.

Amed (Dîyarbekir)

Amed, hetê hûmara kesê ke tede zazakî qisey kenê ra, cayê ke tede zazakî tewr zêde yena qiseykerdiş o. Bi taybetî qezayanê Licê, Pasûr (Kulp), Hênî (Hani), Pîran (Dicle), Çermûg (Çermik) û Çinar de zazakî zaf yena qiseykerdiş. Şarê nê qezayan zafane zazakî qisey keno.

Çewlîg (Bingöl)

Çewlîg, yew bajar o ke tede zazakî sey ziwanê dayîke yena qiseykerdiş o. Nêzdîyê hemê qezayan de zazakî zerreyê keyeyan û cayê umûmîyan de, ziwanê rojaneyîn o. Çewlîg, merkezê kulturê zazayan ra yew o.

Xarpêt (Elazığ)

Xarpêt de, bi taybetî qezayanê Pali, Maden, Sivêrek û Kovancîyan de zazakî ziwanê dayîke yo. Bajarê Xarpêtî bi xo de zazakî hetê şaristanî ra ziwanêko muhîm o. Tayê dewan de, zazakî hetanî ewro ziwanê pêroyî yo.

Dêrsim (Tunceli)

Dêrsim, sey bajarêko ke tede zazakî bi taybetî û bi zafanî yena qiseykerdiş, namdar o. Hetê kulturî û folklorîkî ra, Dêrsim cayêko nîyanên o ke zazakî tede cayêko xasin gêna. Dêrsim de bajar bi xo zî tede hemê qezayan de zazakî yena qisey kerdiş.

Cayê Bînî

Nê çar bajaran ra teber, zafê dewan û qezayanê Sêwregi, Erxenî, Çêrmûge, Mûş, Bêdlîs (Bitlis), Sêrt, Adileman, Erzingan û Wan de zî zazakî yena qiseykerdiş. Zaf zazayî nê serranê peyênan de koçê bajarê girdî sey Stenbol, Anqara, Îzmîr û Edene kerdî û ê cayan de zî zazakî qisey kenê.

Zaf cayan de zazakî sey ziwanê keyeyî, folklorîkî û kulturî dewam kena. Heta ke hem bajaran de hem zî welat ra teber ekolî û weşanxaneyî estê ke zazakî ser o xebitîyenê. Nê cayê ke ma cor de va, ê cayê muhîmî yê ke înan de zazakî qiseykerdiş dewam keno û , zazakî sey ziwanê rojaneyî û kulturî ca gêna.

Ahmed Dirîhî kam o?

Tue, 25 Aug 2026 13:30:00 +0300

Ziwanzan û Cigêrayoxo Namdar Ahmed Dirîhî, 1ê Kanûna Verêne ya 2019î de dewa xo ya Çewlîgî de şi rehmet. Dirîhî, yo ke endamê Kombîyayîşê Kurmanckî yê Enstîtuya Parîsî û endamê Gruba Xebatê ya Vateyî bi, warê cigêrayîşê ziwanê kurdkî de wayîrê xebatanê muhîman bi.

XEBATÊ EY Ê MUHÎMÎ

Serra 1999î de, ey Enstîtuya Kurdî ya Îstanbulî de dest bi qeydkerdişê nameyanê nebatan kerd û na xebate de nameyê 79 bajar û qezayanê Kurdîstanî û nameyê vaşan arê dayî.

Netîceya 14 serran de, ey yew ferheng hazir kerd ke tede 20 hezar nameyî û 1168 rîpelî estbî. Na ferhenge de nameyê nebatan bi kurmanckî, zazakî, soranî, goranî, lorî, tirkî û latînkî ameyê nuştiş. Winî zî ey yew nuşte nameyê "Ferhenga Nameyê Nebatan a Kurdkî" zî hazir kerdbî.

BEŞDARÎYA XEBATANÊ AKADEMÎKAN

Dirîhî serra 2004î de Kovara Vateyî de xebatê xo yê nebatan ser o weşanayî û serranê 2006-2007î de beşdarê kombîyayîşanê Grûba Kurmanckî ya Enstîtuya Kurdî ya Parîsî bi. Serra 2011î de Unîversîteya Çewlîgî de beşdarê yew sempozyumî yo ke zazakî ser o bi, bi.

Merdişê ey reyde, ziwan û kulturê kurdkî cigêrayoxêko erjaye vînd kerd.

Çewlîg de yew resimê cinîyan...

Tue, 25 Aug 2026 12:05:00 +0300

Resimo ke aseno Çewlîg (Bingöl) de ameyo antiş. No yew resim o ke serra 1980î de hetê Şemsî Gunerî ra ameyo antiş. Çarçeweyêko zaf rind o...

Fotograf de cinîyê ke cilê xo yê mehelî dayê xo ra, teber de kay kenê. Cinîyî bi halo şen û weş werîsî ser ra xo erzene. No kay yew kayê senetî yê mintiqa ya.

Şemsî Guner pîyê Fuat Gunerî yo ke endamê grûba MFOyî yo ...

Amedsporî emşo Kocaelî reyde kay keno: Pêro bilêtî qedîyayî

Mon, 24 Aug 2026 12:00:00 +0300

Maç do emşo saete 21:30 de Stadyumê Turka Kocaelî de bêro kaykerdiş. Amedsporo ke tarîxê xo de reya verêne vejîya Lîga Supere, hewteyo verên bi 2 golanê Dia Sabayî û golêke Gokhan Gulî 3-0 Erzurumspor kerd meglub. Ekîba kesk û sûre seba maçê Kocaelî amadekarîyê xo qedînayî û Amed ra kewt rayîr.

Pêro bîlêtê deplasmanî ameyî rotiş

Vajîya ke ê bîlêtê ke seba hetgiranê Amedsporî ameybî cîyakerdene, wextêko kilm de qedîyayî. Ekîba wayîra keyeyî Kocaelispor heweyo verên deplasman de vera Başakşehirî 2-0 bibi meglub. Nê her di tîmî tarîxê xo de reya pancine yenê têver.

Şima hûmaranê bi Zazakî zanê?

Mon, 24 Aug 2026 00:05:00 +0300

ZAZAKÎ DE HÛMARÎ

0 = sifir

1 = yew

2 = di

3 = hîrê

4 = çar

5 = panc

6 = şeş

7 = hewt

8 = heşt

9 = new

10 = des

11 = yewindes

12 = diyes

13 = hîriyes

14 = çares

15 = panciyes

16 = şiyes

17 = hewtiyes

18 = heştiyes

19 = newiyes

20 = vîst

21 = vîst û yew

22 = vîst û di

23 = vîst û hîrê

24 = vîst û çar

25 = vîst û panc

26 = vîst û şeş

27 = vîst û hewt

28 = vîst û heşt

29 = vîst û new

***

10 = des

20 = vîst

30 = hîris

40 = çewres

50 = pancas

60 = şeştî

70 = hewtay

80 = heştay

90 = neway

100 = se

200 = di sey

300 = hîrê sey

400 = çar sey

500 = panc sey

600 = şeş sey

700 = hewt sey

800 = heşt sey

900 = new sey

1.000 = hezar

2.000 = di hezarî

1.000.000 = milyon

1.000.000.000 = milyar

365 = hîrê sey û şeştî û panc

1925 = hezar û new sey û vîst û panc

2009 = di hezarî û new

124 = se û vîst û çar

124.000 = se û vîst û çar hezarî

1.200.000 = milyonêk û di sey hezarî

***

1. = (birinci) yewin (n), yewine (m)

2. = (ikinci) diyin (n), diyine (m)

3. = (üçüncü) hîrêyin (n), hîrêyine (m)

4. = (dördüncü) çarin (n), çarine (m)

5. = (beşinci) pancin (n), pancine (m)

6. = (altıncı) şeşin (n), şeşine (m)

7. = (yedinci) hewtin (n), hewtine (m)

8. = (sekizinci) heştin (n), heştine (m)

9. = (dokuzuncu) newin (n), newine (m)

10. = (onuncu) desin (n), desine (m)

11. = (onbirinci) yewindesin (n), yewindesine (m)

12. = (onikinci) diyesin (n), diyesine (m)

13. = (onüçüncü) hîrêyesin (n), hîrêyesine (m)

14. = (ondördüncü) çaresin (n), çaresine (m)

15. = (onbeşinci) panciyesin (n), panciyesine (m)

16. = (onaltıncı) şiyesin (n), şiyesine (m)

17. = (onyedinci) hewtiyesin (n), hewtiyesine (m)

18. = (onsekizinci) heştiyesin (n), heştiyesine (m)

19. = (ondokuzuncu) newiyesin (n), newiyesine (m)

20. = (yirminci) vîstin (n), vîstine (m)

Azad birinci olmuş. (eril) : Azad biyo yewin. (n)

Şayla birinci olmuş. (dişil) : Şayla biya yewine. (m)