Murad Canşad
Serre 12 mengî ya.
Şewe (bişewe, peşewe) 12 saetî ya.
Roce (biroc, peroc) 12 saetî ya.
Arîtmetîk de yew duzîne 12 heban ra yeno meydan.
Homaxaneyê (panteon) helenan/grekan de 12 homayî est ê.
Benîîsmaîlo ke pîrbabê xo hz. Îsmaîl o, 12 lacan ser ra bîyo qewm.
Benîîsraîlo ke pîrbabê xo hz. Yequb o, 12 lacan ser ra bîyo qewm.
Xirîstîyanîye de 12 şagirdê hz. Îsayî est ê.
Îslamîyet de (mîyanê şîîyan û elewîyan de) 12 îmamî est ê.
Sembolo ke ci rê Estareyê Dawudî vacîyeno û alaya dewleta Îsraîlî ser ra ca gêno, hetê teberî ra 12 verê xo est ê.
Alaya Yewîya Ewrupa ra, sey çemberî, têver de 12 estareyî est ê.
Mîyanê zazayan de, bîlhesa mîyanê zazayanê elewîyan de tesewurê 12 koyan est o.
Mi nê 12 çîyî nuştî, beno ke merdim humara nînan zêde bikero.
Ma bala xo bidê hîkayetê hz. Îsayî ser…
Mi vat la, 12 şagirdê hz. Îsayî est bîyê. Nînan ra Yehuda Îskarîyot îxanet pê keno, ey dano dest. Hz. Îsayî ancenê bi çarmix, bi heqereto pîl û îşkenceyo giran kişenê.
Yew merdimo başo salih meyîtê hz. Îsayî dekeno zerreyê mezele, kemerêka xişne nano fekî ver ra. (O wext mezelî zinaran ra kenîyenê. Qina zinaran ra hendê mezelêk kemer taşenê, meyîtî dekenê bi zerre, kemerêka xişne nanê fek ra… Hz. Îbrahîm, hz. Îsheq, hz. Yequb bi no tore defin bîyê.)
Hîrê rocan ra pey nîya danê ke kemere verê fekê mezele ra nîya. Hz. Îsa candar bîyo, mezele ra vecîyayo şîyo. Şagirdê ey xebere gênê, cayêko talde de yenê pêser. 11 tenî yê. Yehuda Îskarîyot mîyan de çin o. Hz. Îsa dîyar beno, înan rê vano; mîyanê milletan ro vila bibê, înan xo rê bikerê talib. Dime ra ruhê hz. Îsayî weancîyeno bi rîyê asmênan, kîştîya Homayî ya raste de ca beno.
Şagirdê ey mîyanê milletan ro vila benê, dînê hz. Îsayî teblîx kenê. No dîn verî mîyanê milletanê Anatolîya û Mezopotamya de qebul beno, beno dînê kom û komelan. Dime ra vîyareno Ewrupa ser, oca de beno dînê dêran û dewletan. Oca ra zî heme welatan ro vila beno. Ewro rîyê dinya ser ra, dîno ke tewr zêde vila bîyo, dînê hz. Îsayî yo.
Ya 12 şagirdan ra 11 tenî manenê… (Badê, yewna kesî gênê mîyanê xo, benê 12 resulî.)
Sembolêkê Xettîyan/Etîyan-Xîtîtan/Hîtîtan oyo çend hezar-serre est o ke kaînatî temsîl keno. Sey rocî yo; sey tîranê rocî (tîr-roc) 12 gilçekî hetê serî ra est ê. Nînan ra yewer şikîyayo (ke cayê xo bewlî yo) 11 hebî mendê.
Çîyo ke aseno…
Tilsimê 12yî XEttîyan-Xîtîtan ra dest pê keno. No tilsim û sembol mîyanê cîya-cîya şaran û kulturan ro vila bîyo. Mîyanê xirîstîyanan de zî… Beno ke çîyo ke xirîstîyanîye de bi 12, bi 11 vacîyeno, hîkayetê nê sembolî yo.