Wezîrê Karanê Zereyî yê Tirkîya Alî Yerlîkaya hesabê xo yê medyaya dîjîtale X de beyanatêk da û îlan kerd ke operasyonî Edene, Agirî, Enqere, Antalya, Çewlîg, Çorum, Denîzlî, Erzingan, Dîlok, Giresun, Îstanbul, Kastamonu, Kilîs, Konya, Mugla, Nîgde, Osmaniye, Riha, Şirnex, Yalova û Wan de ameyê viraştiş.
Yerlîkaya da zanayîş ke operasyonî bi kordînasyonê Mudirîya Pêroyî ya Emnîyetî, Serekîya Daîreya Têkoşînê Vera Terorî û Serekîya Îstîxbaratî ameyî kerdiş.
Verê cû beyanatê Serdozgerîya Komare ya Îstanbulî de ame vatiş ke operasyonanê ke merkezê ci Îstanbul o û 3 bajaran de ameyî viraştiş de, 110 şikdaran ra eleqeya 41 kesan bi hêrişê Yalova est a.
Serdozgerîya Komare ya Enqere zî eşkera kerd ke operasyonê vera DAÎŞî de 6ê ci welatîyê Tirkî, pêro pîya 17 şikedarî ameyî tepiştiş.
Wezîrê Karanê Zereyî Alî Yerlîkaya verê cû eşkera kerdbi ke 29ê Kanûne de pêrodayîşê operasyonê DAÎŞî yê Yalova de 3 polîsî merdbî. Yerlîkaya dabî zanayîş ke eynî pêrodayîş de 6 çekdarê DAÎŞî yê ke welatîyê Tirkîya yê, ameyî kiştiş. Hedîse de 8 polîs û bekçîyêk zî birîndar bîbî.
Wezîr Yerlîkaya va ke 5 cinîyî û 6 gedeyî zî weş û war ameyî vetene.