Tarîxnas Dr. Sedat Ulugana yo ke Unîversîteya Berlin Freie de xebatkarê akademîkî yo, resmê îdamkerdişê rayberê xoverdayîşê Dêrsimî Seyîd Riza û embazanê ey vetî orte.
Goreyê yew şahîdê îdamkerdişî İhsan Sabri Çağlayangilî, resmê îdamkerdişî rasterast hetê Mustafa Kemal Atatürkî ra ameybî vêşnayîş: “Wextê îdamkerdişî de, yew polîso ke leqabê ey ‘Macar Mustafa’ bi, resmê Seyîd Rizayî antî. Resmê ke ameyî antiş, dîyayê yawerê Wezîrê Zerrî yê ê wextî Şükrü Kaya, ey zî nê resmî mojnayî Mustafa Kemal Atatürk. Atatürkî ke resmî dîyî, bi hêrsêko pîl va: ‘No çi rezalet o? No merdim seyîd o, nê resmî do hêrsê heme Kurdan bîyaro.’ û ferman da ke resmî pîya bi negatîfanê xo bêrê vêşnayîş û bi nê hawayî bêrê vînîkerdiş.”
La goreyê Uluganayî, her çiqas fermanê Atatürkî estbi zî, negatîfî pêro nêameyî vêşnayîş. Seba naye zî, şahîdîya Hıfzı Veldet Velidedeoğluyî ya destpêkê serranê 1940î ya Dêrsimî sey îspat mojneno ke ey mîyanê amadekeranê qanûnê bingehîn ê derbeya 1960î de ca gîrewtbi. Velidedeoğlu xatireyanê xo de dano zanayîş ke ey ‘Tunceli Halkevi’ de resmê îdamkerdişê Dêrsimî dîy.