ZAZAKÎ NEWS – Karsazo Kurd Emîn Osmanî, o ke Swêd de cuyeno, dest bi viraştişê şimiteyêkê enerjî yo bi nameyê "Kurdish Energy Drink" kerd. Wayîrê şîrketê Kurdish Energy Drinkî Emîn Osmanî îzah kerd ke, fîkrê projeyî 2 serrî û nîm verê cû ey de virazîyayo û ey û di embazanê xo yê Rojawanê Kurdistanî ra (Qamişlo û Hisîça) dest pêkerdo.
Emîn Osmanî va:
“Di şîrketê ma estê, yew seba mîyanê Skandînavyayî yo û yew zî seba teberî yo. O yê teberî bi nameyê Kurdistan Energy Drinkî yo û Kurdish Energy Drink a mîyanê Skandînavyayî ya.”
Emîn Osmanî da zanayîş ke înan verî waşto ke nameyê “Kurdistan”î bikar bîyarê la semedo ke Fransa de o name amebi girewtiş, nêeşkayê. Dima waştê ke nameyê “Kurd”î bikar bîyarê la o zî Tirkîya de amebi girewtiş.
Emîn Osmanî wîna dewam kerd:
“Ma nameyê ‘Kurdish’î weçîna û ma Alaya Kurdistanî rona ser la nê semedî ra hetê Tirkîya ra xeylêk zehmetîyî seba ma ameyî vetiş. Ma bi rayîrê yew avûqatê xo yê Qibrisijî eşkay o name bigîrê.”
"Kurdish Cola zî do bibo"
Osmanî eşkera kerd ke ê plan kenê ke ameyox de berhemanê bînan sey "Kurdish Cola" û şimitanê bêşekeran zî virazê.
"Nê qutîyî nînê eştiş"
Wayîrê şîrketê Kurdish Energy Drinkî da zanayîş ke semedê dîzaynê Alaya Kurdistanî yê serê şimitî ra o rastê rexneyan ameyo û va:
“Nê qutîyî semedo ke pere kenê, nînê eştiş. Qutîyî newe ra yenê bedilnayîş (recycling) û zerar nêdanê tebîetî zî. Ma wazenê alaya xo û vengê xo biresne dinya.”
Çime: Rûdaw