Ozcan Yılmaz
Nê serûn ê peyenû de dostenîya Netanyahu û Trumpî fekê keşî ra war ro nêginene. Her kesî hetê ra tahlîl ê berc û muhîmî kerdene. Tayîne vatene « sirrê Trumpî Netanyahûyî dest der ê, xapê eyî fîşto ra gape, Trump her vatena eyî keno ». Tayîne vatene « zamayê Trumpî », tayîne vatene « dosyayê Epsteînî », tayîne vatene « evanjelîzm…. ».
Qirr kerdena Gaza de Trumpî bê şart û qayd poşt dê ve/bi sîyasetê Netanyahuyî. Neyî kî dostenîya Trumpî ra poştî gurete, hondena cos bî, haq, hûqûk, qeyde û qanûn xo vîra kerd her ke şî honde qayde kut, bî har.
Hayleme û hurhurit, zing û tingîye û hengemeyê cengê Lubnan û Îranî de dostenîya nînû zonû rê bîye destan, ci rê bîye pelesenk…her kesî vatene “Netanyahu jê herî nîşto ro poştîya Trumpî, goşî ta dê gurete xo dest, kata ke çarnayî Trump o hetî ser sono”.
Bî bîvîneke aslê mesela jubîna wo. Esasen Trump kesodê famkor û xêx, bê ahlaq, bê fam û îzan, bê ar û edeb o. O ve xo vano ke heyat de, her kar û gure de teyna ju qistasê xo est o: menfaat, kare, fayda!
Peynîye de se bî? Tezelê Netanyahuyî kor bo! Seke Arabî vane “Kazîyeyî anha hen/winî nîbî”!*. Şerê Îranî je wastena Netanyahu û Trumpî rehet û qolay nîbî! Roz ve roz bî derg, zerar o sîyasî û îktîsadî da bi Trumpî.
Trumpî desinde dostenîya xo ca verde, Îranî de muzakere kerd. Hevalê xo Netanyahu raye ra ca verda. Lubnan de, Îran de… tehdît kerd, nîverda ke je vatena xo devam bikero. Netanyahu kerd gostarme û serevde, orte de verda. Îsraîl îzole bî, her ca de teşîr bî… Ê yê ke Trumpî ver de dest û payê xo gîredêne dare de vinetene pêro qalê îxaneta Trumpî kene, vanê Îsraîl tehluke de ro, tecrîd û teşhîr bîyo…
Se vajîme? Bîyo fênda dostenîya hesê birrî û dewijî. Vane rozê mordemê birr de nîyado ke morê puloşîyo vilê hesê birrî ro hama hama ke bixenekno! Mordem simşerê xo bar keno, dano piro, sarê morî çel keno erceno, hesî xelesneno.
Hesê birrî vano “to canê mi xelesna, ez nê xêrê to xo vîrî ra nîken endî ben dostê to, ben qulê çeverê/berê, to rê xizmete û dostenî ken”.
Dewiz kî vano “ez kî tek û teyna wo, ne dost, ne heval, kesê mi çîn o”, dostenîya heşî qewil keno.
Naskerdox û cîranî neyî ra vane “lawo, ti bom a, xêx a… dostenîya heşî çik a, neyî çê xo ra durî bifîye, sarê xo kî qeda û bela mefîye!”.
No gos nêdano nînû. Nîyetê nînû ra sik/şuphe keno vano “nê xêra mi nîwazene, mi rê dismenî kene. Mi rê zerrî têsanîye/hased kene!”. Zonaax û alimî ci ra vane “lawo vinde nîya/winî meke, însanî de dostenî bike, dostenîya hesî çik a” De! No gos ro keşî nîdano.
Rozê no hewna sono. Hesê birrî kî lewe de vindeno. Yekde ju vizike yena nîsena rîyê nê mêrîkî ra. Hesê birî ke lima xo dano we ke pirodo vizike remena sono. Faqat dima oncîya yena nîsena rîyê mordemî ra. Hes oncîya lima xo dano we rem keno. Vizike qe nîvindena oncîya yena nîsena rîyê mordemî ra. Reyê, di reye, hî reye…dano ra ve astê hesî. Hes qarîno, dormê/derûdorê xo de çîyê ke keno saye ke pira kuyo. Kemeradê hewle kuna ra dest. Vizike ke nîsena rîyê mordemî ra, hes kemere bar keno kûno vizike ra! Vizike kiseno dostê xo ra fîno durî! Faqat sarê dostî kî sikneno keno cirn a sure. Dostê xo kî ser o kiseno her çî keno delalî!
Hasilê kelamî, netîceyê meramî: dostenîya xêxî bar o, ejat o, cirm û zerar o, dismen o biaqil dostê xêxî ra rind o! Suî-zan dormê însanî de ju keladês o qeyîm o, nîverdano ke însan qesa raste, nasîhato rind bihesno!
*Aslê mesela henî/winî nîyo
*Keladês: dês o berc û hîra/sed