ZAZAKÎ NEWS -- Şaristanê Dîyarbekirî de, Betul K. ya 16 serre 3 rojî verî cû vîndîbîbî. Keyeyê Betule muracatê polîsan kerd û seba vînayîşê aye xebatê cigêrayîşî ameybî destpêkerdene.
Goreyê malumato ke keyeyî da, Betule 13ê Êlule de Mehlaya Korhatî de seba ke şêra market, keye ra vejîyaya û peyser anêgeyraya. Dima ke keye bi xîretanê xo nêeşka bireso kêneka xo, muracatê Midurîyetê Emnîyetî kerd.
Betul K., netîceyê xebatan de bîşew şaristanê Êlihî de amey vînayîş û ame zanayîş ke rewşa weşîya aye baş a.
Onca, şaristanê Çolîgî de zî 12ê Êlule de Gamze Kaya ya 25 serrî ya astengdare vîndî bîbî û keyeyê aye semedê vînayîşê ayer gerre kerdbi.
Gamze Kaya zî 15ê Êlule de qezaya Şemrexî ya Mêrdînî de amey vînayîş.