DÎYARBEKIR – Kooperatîfê Cinîyan ê KEY-MAYî yo ke girêdayîyê Odaya Tîcaret û Sanayî ya Dîyarbekirî yo, bi berhemanê tescîlkerdeyan ê herêmîyan tehmanê Dîyarbekirî virazeno. Cinîyî, fringî, îsot û zerzewatê bînî ê ke bi îşaretê coğrafî nîşankerde yê û înan verî ra amade kerdê, înan ra werdanê weşan ê Dîyarbekirî virazenê û pêşkêşê hemwelatijan kenê.
Dîyetîsyene û koordînatora mitbaxî ya Kooperatîfê Cinîyan ê KEY-MAYî Zeynep Öcale va ke ê sey Kooperatîfê Cinîyan ê KEY-MAYî, zafaneyî bi bikarardişê berhemanê herêmîyan û yê ke bi îşaretê coğrafî nîşankerde yê, werdanê xo amade kenê. Öcale va, “Ma dîqet kenê ke werdanê goreyê demsalî virazê. Verî ma berhemanê sey hişkayîye, salçe ûsn. viraştêne, nika zî înan werdanê xo de bikaranê. Ma firin de tirşika Dîyarbekirî, belluh, kiftanê mercîyan, çîgkofte viraştî. Ma dolmeya Dîyarbekirî amade kerde, bi tirşî û sumaqe bena. Kiftanê ma yê zereyî estê, mezeyê ma zî mewcûd ê. Mesela, fringîya hişke ke ma bi xo huşk kerdbî, aye bikaranê. Fringîya Licê yew berhemo ke bi îşaretê coğrafî nîşankerde yo, ma ey huşk kenê û sey meze virazenê. Ma bi îsotê Çermikî atom virazenê. Mezeyan de zî ma reyna dîqet kenê ke berhemanê xo yê ke bi îşaretê coğrafî nîşankerde yê, bikar bîyarê”
Öcale, îfade kerd ke ê zafaneyî tewr zaf werd seba 300-400 kesan amade kenê, wina va: ''La tayê wextan de wexto ke yew cîns bo, mesela qewirme û pilaw bo, ma eşkenê hetanî 500-600 kesan vejê. Normal de mitbax de her tim 5 kesî xebitîyenê. La rojanê ma teber ra ekîbê paştîdayîşî gênê û bi nê hawayî ekîbê ma yê mitbaxî eşkeno hetanî 20-25 kesan vejyo.''