Mûmê Suna Eroğlu, a ke qeza Sûrî ya Dîyarbekirî de dikanê xo akerdo û bi malzemeyanê tebîîyan ra yenê hazirkerdiş, hem hetê medyaya komelkî ra hem zî hetê turîstanê herêmîyan û xerîban ra eleqeyêko gird vînenê.
200 cînsê mûmanê tebîîyan
Suna Eroğlu, a ke nezdîyê 200 cînsanê mûman bi esans û hammeddeyê mûmî yê tebîîyan ra virazena vana ke, berhemê mi mûmanê fabrîqeyan ra hîna weşîn ê.
Eroğlu va, “Ez nê karî mecbûrîye ra musa. Demo ke ez sey hosteya musnayoxe xebitîyayêne, mi bi armancê dayîşê perwerdeyî wendekaranê xo, no kar musa. Mîyanê perwerdeyan de viraştişê mûman zî estbi û mi tîya ra dest pêkerd û xo aver berd. Dima ra mi bi armancê kar û meslekî xo da nê karî. Serrêk o ke ez qezaya Sûrî de, Kuçeyê Telgrafxaneyî de atolyeya mûman xebitnena.”
Mûmê romantîkî
Eroğlu, îfade kerd ke ê boya mûmanê xo de esansanê tebîîyan ê ke zerar nêdanê weşîye, bikar anê, wina va: “Mûmê ma zafaneyî hetê wendekaran ra tercîh benê. Kesê ke bi armancê romantîzmî yan zî dekoratîfan bikar anê zî estê.”