Qezaya merkezî ya Bağlarî ya Amedî de, Narin Gürana ke dima ke 21ê Tebaxe 2024 de vîndî bîbî, 19 rojî ra dima meyîtê aye amebi vînayîş, serê gorê xo de ameye yadkerdiş.
Keyeyê Güranî, serê gorê Narine de programêkê vîrardişî hadre kerd. Pîyê aye Arif Güranî va: "Na komele seba Narine, seba vînayîşê Narine şew û roj micadele kerd. Rayîrê heqî yew o. Homa yew o. Qur'an yew o. Rastî zî yew a."
Avukat Mustafa Demirî zî va: "Herçiqas rayîrê qanûnî yê asanî seba hîrê gumanbaran qedîyayî aseno zî, rayîrê qanûnî yê xosere hema zî dewam keno. Ma serê nê rayîran de muracaat kerd. Waştişê ma esto ke Mehkemeya Anayasayî û Serdozgerîya Komare ya Yargıtayî goreyê madeyê 308î dosya berê Meclîsê Pêroyî. Ancî zî ma dosya berd Mehkemeya Anayasayî."