Mehmet Ay
Nê nuşteyê xo de, ez do şima rê qala nêweşîya xirabîya kesayetîye bikera. Na nêweşîye çi semed ra virazêna yan zî yew kesî de senî yena meydan, zelal nîya. Ma eşkenê vajê ke; xirabîya fikrî, hîsî, şermokinîye ûsn. nîşanê na nêweşîye yê û zafane dewrê balixîye de yenê meydan. Na nêweşîye mîyanê xo de tewir bi tewir a. Çareyê tayê tewranê ci hema nêameyo vînayene. Seba tayê tewranê ci zî hem qiseykerdiş hem zî dermanî yenê xebitnayene.
Goreyê kitabê psîkolojîye DSM-5, nîşanê na nêweşîye nê yê:
-
Xirabîya werdişî
-
Fikrê xo kiştişî
-
Bêîstîkrarîya hîskî (bêqerar mendiş)
-
Nobetê hêrsî
-
Çinêbîyayîşê bawerîye
Nê nîşanan ma eşkenê hîna zêde bikerê. Na nêweşîye tedawî bena la wext gêna. Prosesê tedawî de ganî merdim sebir bikero. Ganî yew psîkologî ra paştî bigîro û dermananê xo bixebitno. Sey zaf nêweşîyanê psîkolojîkan, tedawîya na nêweşîye zî di tewir a:
Tedawîya bi Dermanan: Ganî nêweş dermananê ke hetê doktorî ra ameyê nuştene, bixebitno.
Tedawîya bi Qiseykerdişî (Psîkoterapî): Ganî nêweş, yew psîkologî reyde derheqê nêweşîya xo de qisey bikero. Çunke nêweş nêeşkeno bi sereyê xo na nêweşîye ra bifilito.
Bi weşîye bimanê.