İkra Avcı hesabê xo ya medyaya cematkî ser ra eşkera kerd ke bi qerarê Heyetê Berzî yê Dîsîplînî yê Wezaretê Weşîye wezîfeyê xo ra ameya vetiş. Avcıya ke metnê qerarî pare kerd, va: "Hêvîya mi a bîye ke no qeraro şaş bêro bedilnayîş. Ewro ameyo teblîxkerdene: 'Memurîya dewlete ra ameya vetiş'."
Wezaretî çalakîye sey “hêrişo îdeolojîk” dîye
Goreyê malumatanê ke ameyî girewtene, muracaetê Mudirîya Weşîye ya Bajarê Kocaelî ser o dosya hetê Mudirîya Pêroyî ya Xizmetanê Îdareyî ra amey amade kerdene û Heyetê Berzî yê Dîsîplînî de bîye qerar. Kombîyayîşê 19ê tebaxa 2026î de çalakîya Avcı çarçewaya Qanûnê Memuranê Dewlete yê bi numreya 657î de ame ercnayene. Heyetî mûnitişê gijikî bi îdîaya “seba armancanê îdeolojîk yan zî sîyasîyan xirabkerdişê aramîye û pergalê xebate” hesibna û ceza da ke wa memurîya dewlete ra bêra vetene. Teblîxat de ame vatiş ke heqê Avcı esto ke vera nê qerarî muracaetê dadgeha îdarî biko.
Çi bîbî?
Na kampanya dima ke grûbanê çekdaran Rojava de gijikê cinîyêka şerwanî birna û kerd teşhîr ame destpêkerdene. Dinya û Tirkîya de zaf cinîyan seba ke paştî bidê şerwana cinîye û reaksîyon bimojnê, gijikê xo apey da, fotografê xo antî û medyaya cematkî de pare kerdî. Hemşîre İkra Avcı zî seba paştgirîya nê karî amebî hedefmojnayene û derheqê aye de cipersayîş dîyabî destpêkerdene