Arêkerdox: Mistefa GOMAYIJ
Rojêk verg daristan de xo rê seydarey keno, raştî yew çeqelî yeno. Ewnêyen ke halî çeqelî hal nîyo.! Purtî ey rişîyaw û bîyo gerri, boy bexe kewta ci.
Verge agêreno Çeqelî ra vono :
-Ero no çi halî to yo?
Çeqel vergî ra vono:
-Keko mi çîyêko pîs werd ez emel bîyo û teqet ra kewto. Vêşaney ver de ez ha mireno! Qaydî Homay rê mi rî ardim bike. Verg a hînd yeno îman pîzeyê ey çekel veşen
Agêren Çeqelî ra vono:
- De mi hêdî hêdî teqib bikere. Zaf toy şonî yew çayîr de raştî yew estoro bêwayer yenî.
Verg Çeqelî ra vono :
- De ti îtya turincî ra vinde temaşeyî mi bikere û ez to ra çi pers persawa se cewab bide. Verg leza beze dormeley estor yew di dore dono û vengo berza çeqelî ra vono:
-Bewnî çimondî mi ra adir pereno ya ney?
Çeqel vono :
- Mi ra nêaseno keko! Verg yeno nizdî de çeqelî yew pence erzeno rîdî ey çîlalîkî çimondî çeqelî ra perenî!
Verg vono:
-Gereka ti mi ra vajî ‘adır çimondî to ra pereno keko’!
Çeqel cewab dono vono:
-Adir çimon dî to ra peraynî keko!
Verg heyna yew çendî turî nordora estor erzeno û agêreno çeqelî ra von:
-Çeqel! Muyî mi bîyê telî telî ya ney ?
Çeqel vono:
-Willaye mi ra nêaseno keko! Verg yeno nizdî de çeqelî yew penc erzeno rîdî çeqelî gonî û gonaşêr kuwena çeqel ser !
Verg vengo berza çeqelî ra vono:
-Gereka ti mira vajî ‘muyî to bîyî telî telî keko!
Çeqel xofe keno vono:
- Muyî to bîyê telî telî keko! Axir verg yew fêlde pereno estor qirika ay zefte keno û uca estor xeniqneno .
Verg agêren çeqelî ra vono:
-Rêxacinî mi bê pîzeyî xo mird bike.
Çeqel a roj ra pey beno xurt û hinî tenya dariston de seydarey keno.
Rojon ra yew roje çeqel dariston de raştî yew luye yeno. Eke purtî yay rişîyayê û bîya este û çerme menda.
Çeqel Luye ra vono :
-No çi halî to yo waye?
Luye agêrena çeqelî ra vona:
-Keko no are mi leyêrî ardî ez zacluna .Ez nêşîyaya werd bora û bêteqet menda. Qaydî Homay rê mi rî ardim bike. Pîzeyî çeqelî luye veşeno !
Çeqel agêren luye ra vono:
- De mi hêdî hêdî teqibe bikere. Zaf toy şonî yew çayîr de raştî yew cona ya bêwayer yenî.
Çeqel agêren luye ra vono :
- Waklu de ti îtya turincî ra vinde temaşeyî mi bikere. Ez vengo berza yew pers to perseno gereka ti cewabe bida.
Luye vona:
-Wa sey to bo keko! Çeqel ne yew ne di raştbî cona şonu û vengo berza luye ra vono:
- Bewnî çimondî mi ra adir pereno ya ney?
Luye vona:
- Mi ra nêaseno keko! Çeqel hêrs ra agêreno yeno nizdî de luye û yew penc erzeno rîdê yay çîlalîkî çimondî yay ra perenî!
Çeqel hêrs ra vono:
-Gereka ti mi ra vaja adir çimondî to ra pereno keko!
Luye neku çêqî kena vona:
-Adir çimon dî to ra perenaynî keko!
Çeqel yew çendî dorî dormeleyî cona şonu û yeno, agêreno vengo berza luye ra vono:
-Luye! Muyî mi bîyê telî telî ya ney?
Luye vona :
-Willaye mi ra nêaseno keko! Çeqel hêrs ra yeno nizdî de luye yew penc erzeno çermeyê yay muyî kî yaya estê beno telî telî !
Çeqel hêrsa vono:
-Luya mi na fisin, gereka ti mi ra vaja muyî to bîyê telî telî keko! No vatiş ra pey çeqal hewayî vergî xo leteyneno peyra xo virre keno cona sere; cona di paşkilo dona pirnika çeqelî ro payserkî erzino erd ro. Feko pirnokon ra gonî qelibneno û beno xînt!
Luye hêdî hêdî yena çeqelî het û ewnîyêna çeqelî ra vona:
-Ero Xirpo! Bewnî mi newe dî çimî to birêskîyayê û muyî to bîyî telî telî!
Çeqel bêçare ewnîyêno Luye ra vono:
-Wake luye la verg zî une hawa kerde; mîrî estor kişt ard ma werd!
Luye nekunî xo çêqî kena vona:
-Ero çeqel !Ti çeqel î ! O zî verg o . Ti çeqel umey na dinya û çeqel ciwên û şonî. To çiray eşnawito çeqel, keftar û kutîk bîyo verg!
Ti ti be heyna heyna ine gî mew û xo şermizare meke!
Ma ra zurî û Homay ra raşt.