ZAZAKÎ NEWS - Sosyolog û nuştox Îsmaîl Beşîkçî, roja Şemeyî Festîvala FîlmAmedî wexto ke qisey kerdêne, xemîya û amebi wedarîyabi Nêweşxane. Bi tansîyonê berzî ra girêdaye, gonî perrabî mezgê ey û Beşîkçî neqlê beşe sekeratî bibi.
Goreyê agahîyanê ke ameyî girewtiş, tansîyonê Beşîkçîyî kewto war, hişê ey ameyo ca. Labelê hema zî tayê problemê ey yê weşîye dewam kenê û rewşa felcî ya qismî dewam kena.
Yeno vatiş ke 24 saetê ke hetê doktoran ra sey “krîtîk” ameybî namekerdiş, pey de mendê û no yew averşîyayîşo pozîtîf o.
Hetê bînî ra Serekê Weqfa Îsmaîl Beşîkçîyî (İBV) Îbrahîm Gurbuzî medyaya komelkî ser o mesajê Dr. Veysî Ulgenî pare kerd û vat ke weşîya Beşîkçîyî başîye ser o şina.
Gurbuzî parekerdişê xo de nê agahîyî dayî:
“Dr. Veysî Ulgenî no mesaj mi rê erşawit. Ez nika no mesaj şima reyde pare kena. Raşta ci ez zaf kêfweş a. Ma do siba-siba bi xeberanê weşan dest bi roje kerd. Înşallah do xeberê hîna weşî zî bêrê. Mesajê mamosta Veysîyî:
‘Ez bi xebera weşe dest pêbikera. Rewşa Mamosta Îsmaîlî rind a. Eşkeno qisey bikero. Eke odaya taybete veng biba, ê do ey muhtemelen meşte bigîrê uca.”