ZAZAKÎ NEWS - Xelatê Akademîye (Oscar) ke dînaya de warê sînema de sey xelatanê tewr prestîjînan yenê qebulkerdiş, Los Angeles de Tîyatroyê Dolby de bi merasîmêk ameyî dayîş.
Komedyen û kaykerdox Conan O’Brien reya diyîne pêşkêşkarîya merasîmî kerde. Fîlmê "Sinners"î 16 beşan de bibi namzed. Fîlmê "One Battle After Another"î zî 14 beşan de bibi namzed. Reqabetê mabênê nê her di fîlman mohrê xo da merasîm ro.
Labelê serkewtişo tewr pîl ê şewe, fîlmê "One Battle After Another"î yê derhêner Paul Thomas Andersonî vist destê xo. Fîlmî, "Fîlmo Tewr Baş" zî tede beşanê; derhênero tewr baş, kurguyo tewr baş, senaryoya adaptekerde ya tewr başe û castîngo tewr baş de pêro pîya 6 xelatî girewtî.
Sean Penn tewrê merasîmî nêbi
Sean Penn bi rolê xo yê mîyanê fîlmê "One Battle After Another"î xelata "Kaykerdoxê Ardimkarî yê Tewr Başî" girewte la o beşdarê merasîmî nêbi.
Kieran Culkin o ke xelata Pennî da, wina va: “Sean Penn ewro şan nêeşka tîya de bo yan zî nêwaşt tîya de bo.”
'Sinners'î 4 xelatî girewtî
Fîlmê "Sinners"î zî xelatê senaryoya xosere ya tewr başe, muzîkê orîjînalî yê fîlmî yê tewr başî û sînematografîya tewr başe girewtî. Onca, Michael B. Jordanî zî bi nê fîlmî xelata "Kaykerdoxê Tewr Başî" girewte.
Kaykerdoxa tewr başe: Jessie Buckley
Jessie Buckley bi rolê xo yê fîlmê "Hamnet"î de xelata kaykerdoxa tewr başe visti destê xo. Fîlmê "Frankenstein"î zî xelatê dîzaynê berhemî yê tewr başî, dîzaynê kostuman ê tewr başî û dîzaynê makyaj û porî yê tewr başî qezenc kerdî.
Deyîra K-popî xelat girewte
Deyîra "Golden"e ya fîlmê "K-Pop Demon Hunters"î xelata deyîra orîjînale ya tewr başe girewte. Bi no qayde "Golden" bîye deyîra verêne ya K-popî ke tarîxê Oscarî de xelat gurewta. Fîlmî eynî wext de xelata anîmasyonê tewr başî zî girewte.
Sehne ser o peyamê sîyasîyî
Tayê hunermendan merasîm de peyamê sîyasîyî zî dayî. Kaykerdox Javier Bardem qiseykerdişê xo yê xalîya sure ser o, bi vateyê "Şerî rê nê" veng da.
Ekîba fîlmê "The Voice of Hind Rajab"î, yo ke hîkayeya domana Fîlîstînije Hind Rajabe ano ziwan, bi rozetanê "adirbesto dayîmkî" tewrê merasîmî bîye.
Pêşkêşkar Conan O’Brienî zî qiseykerdişê xo yê akerdişî de bale ante serê zekaya sûnî (hişo viraşte) û va, "Beno ke ez pêşkêşkaro merdim o peyên bibî."
Tayê serkewteyê xelatanê Oscarî nê yê:
- Fîlmo tewr baş: One Battle After Another
- Derhênero tewr baş: Paul Thomas Anderson – One Battle After Another
- Kaykerdoxo tewr baş: Michael B. Jordan – Sinners
- Kaykerdoxa tewr başe: Jessie Buckley – Hamnet
- Kaykerdoxê ardimkarî yo tewr baş: Sean Penn – One Battle After Another
- Kaykerdoxa ardimkare ya tewr başe: Amy Madigan – Weapons
- Anîmasyono tewr baş: K-Pop Demon Hunters
- Fîlmo tewr baş o mîyanneteweyî: Sentimental Value
- Senaryoya xosere ya tewr başe: Sinners – Ryan Coogler
- Senaryoya adaptekerde ya tewr başe: One Battle After Another – Paul Thomas Anderson