Mihemed Kurdî
Ena dinya de semedê merdiman sermayeyo tewr pîl wayîrbîyayişê zerrîyêka pank a. Zerrîpakî cuyê merdimî de ercê tewr avzel û qiymetin o. Çimkî zerrîya pank başîyê emrê endamanê binî yê laşê merdimî keno û çew destê aye/ ey merdimî de xerabî nêvîneno. Xora eke zerrî û laşê merdimî wirdî pank bo, o mihal ê kesî dinya û axîret de serkewte yê û Homa zî û evd zî înan ra razî yê. Yanê zerrî qandê merdimî sey femandarêkî yo. Eke fermnadarêk baş bo û çîyo baş bikero, o mihal leşkerê ci zî do biewnî ey ra başîyê bikerê la eke serek xerab bo û çîyo xerab bikero o mihal merdimên ci zî do sey ey bikerê. Raşta ci zerrî zî wina ya, eke pank bo do başîye bi wayîrê xo bido kerdiş û eke lêmin bo zî do xerabîye bido kerdiş. Ena ray o muhîm no yo ke merdim baş qaydê zerrîya xo bikero û aye baş bişinaso, çimkî eke merdim zerrîya xo baş bişinasino do xo zî bişinasino, oyo ke xo bişianasino do Heqî/Homayî zî bişinaso. Xora zerrîya ke mîyanê xo de vîr û bawerîya pank hewîneno rî û rayîrê merdimî zî roşin keno, aye semed ra zî zerrîpakî roşnîya zerrîya merdiman a.
Arizîyê Zerrîyê Pankî
Verê her çîyî ganî zerrîya pank başî û xerabîyê yewbînan ra cîya bikero û xo xerabîye ra bido pey û hergo muracatê başîye bikero. Çimkî zerrîyêke ke başîye û xerabîyê cêra nêkero a zerrî merde ya, aye semed ra zî ganî zerrîya pank bi zanayîşê xo başî û xerabîyê cêra bikero û ancî bi eşkeyiş û iradeyê xo zî başîye biweçîno.
Eke zerrî bî halîna xerabîye, yanê eke merdim hergo guneyan bikero o mihal zerrîya merdimî wişkêr beno û eke zerrî wişk bîyo tobekerdişê dûr keweno û fikrê xerab tede serwer/serdest beno, dima zî zerrî beno zerîyêko xerab û bê xêyr. Yanê zerrî de yew nûr û roşna nêmaneno û beno sîya, bêyî ke bizano xêyr o yan zî guneh o çi weşîya ey ra şino o wina keno.
La zerrîya pank, zerrîyêka sipî ya û hergo çilayê bawerîye tede akerde yo, aye semed ra fîtne û xerabî çi rey nêeşkenê dekewê ci. Zerrîya pank, zerîyêka nazenîn û nerm a û bi xo bawer a, ters û hêvîya ci hergo tenya Heq o. Aye semed ra nefret, xopîlvînayiş, hesûdîye, weşnêbîyayiş û heskerdişê malê dinya çi rey nêeşkenê xo zerrîya panke de bi ca bikerê.
Zerrîya pank, o zerrîya ke hergo Heq û razîbîyayişê ci xora kena xem, verê ci her tim Heqî de yo û heme karan de nîyet û armancê ci zî reyna Heq o. Miradê zerrîya pank hergo razîbîyayişê Heqî yo, aye semed ra wexto ke yew emrê Heqî bi ca ano zaf bextewer beno.
Her çiqas dewro ke nika ma tede yê de zerrîpakî beno semedê belengazîya merdim û komeleyan la reyna zî başî baş o û başî başîye ano, yanê ganî merdim çi rey fek zerrîpankîya xo ra vera nêdo. Pîlanê ma bîlaheq nêvato " başîye bikere û bierze mîyanê awe", yanê gama ke merdim başîyê bi yewî bikero ganî duştê ey de çîyêk nepawo yan zî hêvî nêkero, çimkî başî çi rey vîndî nêbeno û bêguman do rocêk bireso cayê xo. Aye semed ra zî semedo ke ma başîyê bivînê ganî ma bi xo zî başîyê bikerê û bibê sedemê başîyê.
Ma Kurdî şarê xerîban ra zaf hes kenê û qiymet dan înan la çi heyfo ke ma vera yewbînan de şarêkî zaf zerrîwişk ê û ma çi rey xêrê yewbînan nêwazenê, aye semed ra zî ma seserrre ra vêşêr o ke hêgayê xo ser de (Kurdistan) binê zilmî de yê. Bêguman eke şarê ma zî yewbînan ra hes bikerdêne û duşmenîye yewbînan nêkerdêne beno ke ewro ma zî erdê xo ser de bindest û perîşan nêbîyayêne, çimkî eke ma zî xêrê yewbînan biwaştêne bêguman ma zî do ewro xêr bivînayêne û bibîyêne wayîrê welatê xo.
Ena ray semedê xelasîyê şar û welatî Heq zerrîyêk pank û pirra xêyr bikero nesîbê şarê ma, rike, hesûdî û xerabîyê zerrîya ma de biwedero û herinda ci de zerrîya ma bi yewbînan nerm bikero û bido heskeriş.