FIRAT ŞÎN
Serekê Meclîsî Numan Kurtulmuş, 26 serran dima sey serekê meclîsî yo verên Şaredarîya Dîyarbekirî zîyaret kerd, la rojdem de en zaf persê derheqê hepsê Demîrtaşî ca estbî.
Serekê Meclîsê Girdî yê Miletî yê Tirkîya (TBMM) û Serekê Komîsyonê Proseê Neteweyî, Birayî û Demokrasîye Numan Kurtulmuş, çarçeweyê yew programêko hîra de Dîyarbekir de bi. Bi no zîyaret, Kurtulmuş 26 serran dima bi serekê meclîsî yo verên ke Şaredarîya Bajarê Girdî ya Dîyarbekirî zîyaret kerd.
Kurtulmuşî, 450 ra zêdeyêr temsîlkarê Sazîyanê Komelê Sîvîlî (SKS) dir ame têhet. Parlamanterê AK Partî yê Dîyarbekirî Mehmet Sait Yaz, Hetkarê Serekê Pêroyî yê Partîya DEVA Mehmet Emîn Ekmen, Wekîlê Serekê Grûba AK Partî Abdulhamît Gul û Parlamenterê Partîya Saadetî yê Îstanbulî Bulent Kaya zî heyet de c girewtî. Nê çar sîyasetkarî zî Komîsyonê Paştîdayîşê Neteweyî, Demokrasî û Birayîye yo ke Meclîs de ronîyayo de ca genê.
La ame îfadekerdiş ke no zîyarete, zîyaretêko resmî yê komîsyonî nîyo. Ancax şarê Dîyarbekirî zîyaretê Kurtulmuşî sey zîyaretê komîsyonî vîna yan zî hesipna. Waştişê xo yê derheqê prosesî de ard ziwan. Înan va ke "samîmîyetê prosesî, azadkerdişê Demîrtaşî ra vîyareno."
Zîyaretê Numan Kurtulmuşî yê Dîyarbekirî de gelek çîyê muhîmî zî qewimîyayî.
Kurtulmuşî programê akerdişê serra akademîke yê Unîversîteya Dîcle de seba Kurdkî va "Sey şitê dayîke helal o." Dima ra şîîrêka kilme bi Kurdkî wend. Eşkerayîya xo ya ke Unîversîte de derheqê prosesî de vatibi, yanî "Na rey ya ma serbikewê, ya zî emperyalîstî do serbikewê. Mutleqa ma do serbikewê", pêvînayîşê bi SKSyan de zî newe ra nê vateyê xo tekrar kerdî.
Serekê Meclîsî Dîyarbekir de parlamenteran dir Nimajê Îne kerd, tîya de goşdarîya xeylê şarê Dîyarbekirî kerd. Ê ke Kurtulmuşî ra kar waştî zî bîyî, a ke waştêne hesabê qatilanê lajê xo yê astengdaro ke amebî kiştene biperso zî bîye... La hem hewşê camî de hem zî molaya çay-sîmîtî ya verê camîye de, persa ke sîyasetkaran rê en zaf ameye perskerdene "Eke proses esto, Demîrtaşî çira hema zere de yo?" bîye.
Welatîyêkê Dîyarbekirîjî ke kamerayanê TVyî ver de veng da Numan Kurtulmuşî, va: "Eke şima wazenê ma sey şarî şima rê bawer bikerê, eke şima wazenê no proses bi hawayêko weş netîce bigîro, ganî verî Selahedîn Demîrtaşî bireso azadîya xo."
Pêvînayîşê bi STKyan
Eleqeyê seba kombîyayîşê STKyan ê Dîyarbekirî ke 450 ra zêdeyêr temsîlkarî tewrê ci bîyî, zaf gird bi. Salon de hem Dayîkê Aştîye hem zî Dayîkê Dîyarbekirî estbîyî, STKyî hetanê cîyayan de ronişte bîyî.
Sereka Hemserdarî ya Şaredarîya Bajarê Girdî ya Dîyarbekirî Serra Bucak program de qisey kerd, ard vîrî ke Şaredarîyê Bajarê Girdî yê Merdîn û Wanî reyde pîya 11 şaredarîyî hetê qayûman ra yenê îdarekerdene. Bucak va ke, gere sîstemê qayûmî wedarîyo û serekê şaredarîyan ê ke wezîfe ra ameyê giretiş zî peyser agêrê kare xo ser."
Numan Kurtulmuşî zî qiseykerdişê xo de derheqê prosesî de eşkerayî da. Ey va ke mifteyo zêrên ê serkewtişê nê prosesê zehmetî, "pawitişê huqûq û rûmetê Kurdan û pawitişê şerefê Tirkan" ra vîyareno. Kurtulmuşî va ke şerê çekdarî yo ke 50 serrê Tirkîya girewtê, bi desan hezaran merdimî merdê û îfade kerd ke zerarê madî zî 2 trîlyon dolarî vîyarto.
Kurtulmuşî va, "Ma do dejanê vîyarteyan ser o munaqeşeyanê neweyan nêvirazê" û bale ante serê muhîmîya famkerdişê dejanê yewbînan. Kurtulmuşî va ke ganî her kes diqetê ziwanê xo bikero