ZAZAKÎ NEWS - Şaredarîya Bajarê Girdî ya Amedî, semedê demê neweyî yê kursanê ziwananê Kurmancî, Zazakî, Ermenkî, Suryankî û Sorankî, mabênê 7-16ê Sibate de do muracatan qebul bikero.
Serekîya Dayîreyê Karanê Kultur, Huner û Cimatkî, çarçeweyê xebatanê zafziwanîye û zafengîya kulturî, kursanê demê neweyî dana dest pêkerdene. Kursê ke do bêpere bîyêrê dayene, seba kesanê ke emerê înan 16 serre û berzêr ê.
Kursî do Kurmancî, Kirmanckî (Zazakî), Ermenkî, Suryankî û Sorankî bêrê dayîş.
Sewîyeyê kursan bewlî bî
Seba Kurmancî teberê sewîyeya destpêkî sewîyeyanê A1, A2 û B1î de perwerde do bêro dayene. Kursê Kirmanckî (Zazakî) zî sewîyeyanê A1, A2 û B1î de yenê plankerdene. Heto bîn ra kursê Ermenkî A1 û A2, Suryankî A1 û Atolyeya Sorankî zî sewîyeya A1î de do bêrê akerdene.
Teberê kursanê ziwanan de, Atolyeya Wendiş-Nuştişê Kurmancî zî demê neweyî de do seba welatîyan bêra organîzekerdene.
Muracatê kursanê ke heme bêpere yê, mabênê tarîxanê 7-16ê Sibate de adresê dismek.diyarbakir.bel.tr ser o eşkenê bêrê kerdene.