ZAZAKÎ NEWS - Cezaya ke Federasyonê Futbolî yê Tirkîya (TFF) seba sloganê reklamî yê Kurdkî dabi Amedsporî, Amed de bi yew eşkerayîya hempare ameye protestokerdene. Organizasyonê komelê sîvîlî, îdarekarê mehellî û terefdarî Meydanê Şêx Seîdî de ameyî têhet û eşkerayîye day.
Bi rayberîya Meclîsê Îstîşareyê Berzî yê Amedsporî eşkerayîya çapemenîye ameye kerdene û Hemseroka Şaredarîya Bajarê Pîlî ya Amedî Serra Bucak, Parlamenterê CHP yê Amedî Sezgîn Tanrikulu, Serekê Baroyî Abdulkadîr Guleçî reyde xeylêk temsîlkarê STKyan û terefdarî tewrê ci bîyî. Eşkerayîye de ame vatene ke Amedspor tena yew klûba futbolî nîyo, sembolê nasname û hîsê aîdîyetî yê bajarî yo.
Bucak: Amedspor aîdîyetê nê bajarî yo
Eşkerayîya çapemenîye de Hemsereka Şaredarîya Bajarê Pîlî Serra Bucak qisey kerde û vat ke Amedspor serran o ke tena yew klûba sporî nîyo, parçeyêko muhîm yê mucadeleyê aştîye, seyyewbînîye û demokrasîye yo. Bucak wina dewam kerd: “Amedspor tena yê nê bajarî nîyo, bi koma terefdaranê xo ya ke heta dîaspora şina, yew nasname yo. Ma do wayîrvejîyayîşê taxîmê xo rê dewam bikerê.”
Eşkerayîye bi Kurdkî Serdar Keskînî, bi Tirkî zî Sereka DOGUNKADî Ozlem Kulahci Tanaman wende. Tanamanî da zanayene ke Amedspor serran o raştê muameleyanê cîyakeran maneno û îfade kerd ke cezaya ke bi bahaneyê reklamê Kurdkî ameya dayene, tena yew klûbî nê, heme komelê Kurdan hedef gena.
Amedspor: No bîyo yew kampanyaya nefretî
Îdareyê Amedsporî zî eşkerayîya xo de ard vîrî ke reklamê Kurdkî yê ke verê cû TFFyî qebûl kerdbi, hetê tayê cayan ra medyaya komelkî de ame hedefgirewtene û no demêko kilm de bîyo yew kampanyaya nefretî.”
Tanrikulu: Amedspor taxîmê mîlyonan kurdan a
Parlamenterê CHP Sezgîn Tanrikulu zî eşkerayîye de qisey kerd û vat ke Amedspor tena yê Amedî nîyo, taxîmê heme herême û mîlyonan Kurdanê Tirkîya yo. Tanrikulu wina dewam kerd: “Cezayê ke seba çar çekuyanê Kurdkî yê serê formayê ci yenê dayene, nefret û cîyakerdişî teşwîq kenê. Ez veng dana otorîteyanê kamuyî ke wa nê muameleyan peynî bîyarê.”