Serekê verîn yê Şaredarîya Esenyurtî Ahmet Ozer o ke 300 rojan ra zêdeyêr hepisxane de mend, Serekê Pêroyî yê MHPî Devlet Bahçelîyî zîyaret kerd.
Ozerî, da zanayîş ke Bahçelîyî seba Selahattîn Demîrtaşî yo ke 9 serran ra zêdeyêr o Edîrne de girewte yo, îfade kerdo ke ganî 'ca de' bêro veradayîş.
Ozerî nê çîyî vatî:
"Zafaneyê nê qiseyan cewabê qiseykerdişanê mi bîy. Wexto ke mi ti ra va ganî qerarê AYM (Mehkemeya Qanûnê Bingeyênî) û AHİMî (Mehkemeya Heqanê Merdiman ya Ewropa) bêrê caardiş, ey va: 'Ez fîkrîyena ke veradayîşê Selahattîn Demîrtaşî seba feydeyê welatê ma bo û do paştî bido prosesê aştîye.' Dima ra behsê paştîdayîşê mi, yê Ahmet Turkî û yê Selahattîn Demîrtaşî yê seba prosesê aştîye kerd."
Ozerî îfade kerd ke Bahçelîyî proses de behsê rolê ey zî kerdo û wina vato: "Derheqê rolê mi yê prosesî de sey yew aktorî qisey kerd. Îfade kerd ke ganî dîyalog nika ra pey zî dewam bikero. Eynî wext de va ke o wazeno Selahattîn Demîrtaş azad bo."
Ozerî, waştişê Bahçelîyî yê seba vetîşê qanûnan wina ard ziwan: "Derheqê prosesê aştîye de va ke o bi mi reyde eynî nuqte de yo. Behsê xebatanê komîsyonî kerd. Ard vîr ke heta nika 19 pêvînayîşî bîyê, MHP û DEMî raporê xo dayê û va ke pawîyêno ke CHP û AK Partî zî raporanê xo bidê. Va ke, ‘Eke ê zî lez de bidê, proses do lez aver şêro û dima ra qanûnî do bivejîye.’