ZAZAKÎ NEWS - Partîya DEMî verê weçînayîşanê şaredarîyan ê 31ê Adara 2024î, sozê sey "şaredarîya zafziwanîye" û "xizmetê bi ziwanê dayîke" dabî. Labelê netîceyê raporê peyên, nîşan dano ke nê sozî nêameyê caardiş.
Badê weçînayîşanê herêmîyan ê 2024î, ganî Partîya DEMî nê çalakîyê ke bernameyê xebatanê xo yê weçînayîşî de pêşkêş kerdbî, bîyardêne ca:
* Kreşê zafziwanîyî do seranserê roje xizmet bidê.
* Kreşê tutan ê zafziwanîyî, kurs û kitabxaneyî, kitabê hîkayeyan ê zafziwanîyî, kayê domanan û amadekerdişê ferhenganê teswîrîyan; projeyê kulturî yê zafziwanîyî.
* Şaredarîye do xebat, nuşte û eşkerayîyanê xo bi awayêko zafziwanî bikero.
* Mudurîyetê Pawitiş û Averberdişê Ziwanî do bêrê ronayîş; do xebate seba pawitiş û averberdişê ziwananê Kurdkî (Zazakî-Kurmancî) Suryankî, Ermenkî, Erebî û ziwananê herêmîyan ê cîya-cîyayan bêro kerdene.
* Namekerdişê bajar, mehle, dewe, kuçe û rayîran bi ziwananê zafan do dewam bikero. Tabela û panoyê reklamî do zafziwanî bibê.
* Viraştişê cayanê kulturîyan ê sey Keyeyê Dengbêjan do dewam bikero.
Goreyê raporo ke Ajansê Mezopotamya (MA) amade kerd, 62 şaredarîyanê ke nika destê Partîya DEMî de yê, xebatê serê ziwanê Kurdkî hîna zaf çarçeweyê çalakîyanê hayîdarî de sînorkerde mendê.
Keyepelê 46 şaredarîyan tena Tirkî yê
Herçiqas ke wextêko derg weçînayîşan ser ra vîyarto zî, keyepelê 46 şaredarîyan tena bi ziwanê Tirkî xizmet pêşkêş kenê.
Xeylêk bajar û qezayanê sey Agirî, Gîyadîn, Bazîd, Amed, Pîran, Erxenî, Hêni, Sûr, Rezan, Karaz, Farqîn, Licê, Mêrdîn, Nisebîn, Dêrik, Artuklu, Şemrex, Mûş, Milazgir, Gimgim, Kop, Sêrt, Misirc, Cizîr, Wan, Erdîş, Westan, Payîzava, Elbak, Ebex, Şax û Qelqelîye de keyepelê şaredarîyan yewziwanî (Tirkî) yê.
Goreyê raporê MAyî, tena keyepelê 9 şaredarîyan bi awayêko zafziwanî xizmet danê. Zazakî zî tena keyepelê Şaredarîya Amedî ya Girdî de esta û ê binan de Zazakî qet çîn ya. Keyepelê Şaredarîya Amedî de Zazakî serra 2015 de îlawe bîya.
Tena 4 kreşê Kurdkî ameyî akerdene
Sozanê tewr pîlan ê Partîya DEMî akerdişê kreşanê zafziwanîyan bi la nê warî de zî xebatî zeîf mendî. Tena Şaredarîya Pîle ya Amedî û Şaredarîya Peyasî de pêro pîya 4 kreşê zafziwanîyî akerdê.
Derheqê merkezanê kulturîyan de zî teberê Amedî de, tu "Keyeyê Dengbêjan" o newe nêameyo akerdene.
Netîceyî nîşan danê ke xebatê şaredarîyanê Partîya DEMî yê derheqê ziwanê dayîke û ziwanê Kurdkî de sewîyeya sozanê weçînayîşî de nîyê û gamê verçimî û dayîmkîyî sînorkerde yê.
Yeno vatene ke zafanîya şaredarîyan de, xebata bi zafziwanîye nêbîya sazgehî û karê ke ameyê kerdene hîna zaf sewîyeya sembolîk û hişyarkerdişî de mendê.
