Rapor bi kombîyayîşî ke Şûbeyê Êlihî de ame viraştene, ame eşkerakerdene. Hemvervatoxa Komîsyonê Hepisxaneyan Nazli Duran rapor wend.
Nazli Duran ard ziwan ke binpaykerdişaê giranan ê sîstematîkan serra 2025î de zî dewam kerd: "Serre de Merkezê Pêroyî, şûbeyan û temsîlkarîyanê ma rê pêro pîya 889 muracatî ameyî kerdene; netîce de 24 hezar û 207 binpaykerdişê heqan ameyî tesbîtkerdene. Warê işkence û muameleyê xirabî de 2 hezar û 945 binpaykerdişî ameyî tesbîtkerdene. Nê binpaykerdişî: pirodayîş, tehdît, heqaret, zordayîşê casusîye û caardişê tecrîdî gênê xo mîyan. Datayî mojnenê ke cigêrayîşê baneyî, tekmîldayîşê payan ser o, rayîrşîyayîşê bi nîzamê leşkerî û vilakerdişê çîyanê şexsîyan de sereştişan de bi hewayêko sîstematîk dewam kenê.
Goreyê malumatanê fermîyan yê zabitnameyanê TBMMyî yê 6ê gulane 2026î, serra 2025î de hepisxaneyan de pêro pîya 1.001 tepîşteyî ganê xo ra bîyî: 869 hebî bi hewayêko xozayî, 132 hebî zî prosesê qeza yan destûrî de. Bi naye, mîyanê 1ê çeleyî û 6ê gulane 2026î de 26 tepîşteyan xo kişt û hetê meqamanê fermî ra ame vatene ke înan ra 14 heban dermanê psîkîyatrîkî şuxulnayêne."
Nazli Duran tekîd kerd ke beşêko muhîm ê binpaykerdişanê heqê cuye netîceyê ihmalan o. Tedawînêkerdişê nêweşîyanê giranan, ereykerdişê sewqkerdişê nêweşxaneyan û şert û mercê neweşî yê rakewtişî: "Bi naye, xirabîya psîkolojîke ya rejîmê tecrîdî, mergê şikdarî û xokiştişî resayî sewîyeyêka xemgîne. Pê heme hişyarîyanê keye û avûkatan zî tedbîrê lazimî nêameyî tepîştene; tayê vaqayan de tepîşteyî heta ke ganê xo ra bîyî, hucreyan de ameyî tepîştene.
Goreyê datayanê ÎHDyî, hepisxaneyanê Tirkîya de tewr kêmî hezar û 412 tepîşteyê nêweşî est ê; 335 hebê înan statuyê nêweşê giranî de yê: 230 tepîşteyî nêeşkenê tena bi sereyê xo cuya xo dewam bikerê, seba 105 tepîşteyan ê mitaqayî piştîdayîşêko domdar lazim o û 188 tepîşteyî ganî binê çimdarîya tibî ya biserûbere de bêrê vindarnayene. Raporê Sazgehê Tibê Edlî (ATK) krîteranê zanistî û huqûqî ra dûrî yê."
Nazli Duran veng da ke hepisxaneyan de şert û mercê ke rûmetê merdimî rê munasib ê, bêrê temînkerdene û binpaykerdişê heqan biqedîyê.
