Komîteya Hazirîye ya Festîvala Kulur û Xoza ya Munzurî ya 24ine ya ke emser do bi şîare ''Ma Seba Vîr û Cuya Azade Wayîrê Xoza, Ziwan,Kultur û Bawerîya Xo Vejîyenê'' mabênê tarîxanê 29ê temmuze û 2ê tebaxe de bêro kerdene, vizêr programê xo eşkera kerd.

Festîvale 29ê temmuze de verê Şaredarîya Qisle de do bi rayraşîyayîşê zîyaretê Duzgun Babayî bêro destpêkerdene. Eynî roje merkezê Dêrsimî de belgefîlmê "Dört Mevsim Dersim" do bêro mojnayene.

30ê temmuze de merkezê Dêrsimî de bi def-zurna û pêramotişê ekîbê Varvara akerdiş do bêro kerdene. Kuçeyê Sanatî ra heta Meydanê Seyîd Rizayî do rayraşîyayîş bêro kerdene. Dima ra qiseykerdişê akerdişî bêrê kerdene. Eynî roje Pêrtage de programê konserî, Pulur de rayraşîyayîşî Çimeyanê Munzurî, panel, forum, loqmayê aşûre, rayraşîyayîşê xoza û konserî do bêrê kerdene.

31ê temmuze de zî do panelê ziwan, kultur û bawerî yê bi sernameyê ''Ziwan, Bawerî û Rêça xo Vîra Meke'' û panelê ''Vizêrî ra heta Ewroyî Têkoşînê Cinîyan û Dêrsim'' bêrê kerdene. Heta şanî aktîvîteya ziwanê dayîke de goştarîkerdişê sanikan, saetanê şanî de ZeleMele, Agîrê Jiyan û Petra Nachtmanova zî tede hunermendî do vejîyê sehne. Çarçewaya festîvale de deklarasyono hempar do bêro wendene û belgefîlmî bêrê ramojnayene.

1ê tebaxe de panelê bi sernameyê ''Binê Rijnayîşê Ekolojîkî de Xozaya Dêrsimî'' û ''Tirkîya de Proseso Sîyasî,Rojhelatê Mîyanênî û Hegemonyaya Enparyalîste'' bêrê kerdene. Program bi rayraşîyayîşê xoza do dewam bikero. Konserê şanî de Erdogan Emir, Grup Munzur, Mîkaîl Aslan û Tara Memedova do vejîyê sehne.

Roja peyên a festîvale 2ê tebaxe de panelê ''Problemê Aktuelî yê Dêrsimî'' û aktîvîteya kursuyê serbestî ke ciwanî do tede qisey bikerî, bêrê kerdene. Festvale de do pêramotişê nostaljî ke heme afîşê Festîvala Munzurî bêrê ramotene û her şanî de belgefîlmê cîya cîyayî bêrê ramojnayene.

Komîteya hazirîye vat festîvale de sernameyê pawitişê xoza, ziwanê dayîke, vîrê kulturî, azadîya bawerî, têkoşînê cinîyan, cuya ekolojîke û komelê demokratîkî do vejîyê vernî û seba tewrbîyayîşê festîvale veng da şarî.