Qezaya Kanîreşî ya Çewlîgî û qezaya Gimgimî ya Mûşî de, dewanê ke hemsînorê yewbînan ê de, yeno waştiş ke projeyê Santrala Enerjîya Jeotermalî (JES) bêro caardiş. Vera projeyo ke hetê şîrketa IGNIS H2 Enerji A.Ş. ya bi merkezê Amerîka ra ame plankerdiş, hemwelatîyan aşma nîsane de Mehkemeya Îdareyî ya Çewlîgî de prosesê huqûqî da dest pêkerdiş.
Çarçewaya prosesê huqûqî yo ke bi waştişê betalkerdişê projeyî ame dest pêkerdiş de, aşma temmuze de mehkeme qerarê keşîfî û raporê pisporan da.
Goreyê qerarê mehkeme Kanîreş de keşîf ame viraştiş. Wexto ke heyetê mehkeme dewanê Lîcîk, Çermî û Şorîkî yê ke tede bîrê sondajî ameyê bewlîkerdiş de cigêrayîş kerd, hemwelatîyî zî ameyî uca.
Pîya bi şarî, Parlamenterê Îzmîrî yê Partîya DEM Partî û Hemvervatoxê Komîsyona Ekolojîye Îbrahîm Akin, Parlamentera Mûşî Sumeyye Boze, avûkatê Baroya Amedî û rêxistinê ekolojîye yê Kurdistan û Tirkîya zî heyetê keşîfî taqîb kerd.
Îbrahîm Akîno ke tîya de qisey kerd, va ke ê keşîfî cayê ci de taqîb kenê û îtîrazê şarî yê vera projeyî esto. Çewlîg ra dest pêkeno û heta noqtaya ke Gimgimî de ya dewam kena de do keşîfî bêrê viraştiş. Hêvîdar a ke raporê heyetê mehkeme seba pawitişê ercanê şarê ma bo. Labelê ma her şertî de, rapor çi beno wa bibo, do hetê têkoşînî de bê.”
Heyetê keşîfî, dima ke Kanîreş de cigêrayîşê xo temam kerd, derbazê Gimgimî beno û uca de zî cigêrayîşan do bikero.
