Lîganê futbolî yê profesyonelan ê Tirkîya de maçanê ke peynîya hewteyî de ameyî kaykerdene de Amedspor, Batman Petrolspor, Îdir FK û Vansporî reqîbê xo mexlûb kerdî. Hewteyo ke her çar taximan zî bi hîrê puanan temam kerd de Amedspor, bi serkewtişê Samsunsporî Super Lîg de kursîyê lîderîye ser o ronişt.
Futbolê herême de maçanê ke tarîxanê 23-25ê teşrîna verêne de ameyî kaykerdene de çar taximî serkewtî.
Amedsporî deplasman de Samsunspor 2-1, Batman Petrolsporî Esenler Erokspor 3-2, Îdir FKyî deplasman de Bandirmaspor 2-1, Vansporî zî deplasman de Boluspor 3-0 mexlûb kerd.
Çar taximan, maçanê ke kay kerdî de pêro pîya 10 golî eştî, keleyanê xo de 4 golî dîyî û hewte bi 12 puanan temam kerd.
Amedspor Super Lîg de vejîya lîderîye
Hewteyê 9. yê Trendyol Super Lîgî de Amedsporo ke bi meymanê Samsunsporî, maç ra 2-1 serkewte vejîya û puanê xo vet 20î.
Samsunspor, deqaya 21. de bi golê Logi Tómassonî kewt vernî. Amedsporî, deqaya 74. de bi golo ke Gift Orbanî penaltî ra qeyd kerd seypêmendiş ard ca. Golo ke serkewtiş ard deqaya 83. de Dia Sabayî eşt.
Maç de Samsunsporî ra Afonso Sousayî deqaya 37. de karta sûre dîye, Amedsporî ra zî Mbaye Diagneyî deqaya 60. de bi karta sûre kay ra vejîya.
Bi na netîce 9 maçan de 6 serkewtişî (galîbîyetî), 2 seypêmendişî (beraberîyî) û 1 binkewtiş (mexlûbîyet) girewt û bi 20 puanan ejîya lîderîye.
Batman Petrolsporî deqayanê dergkerdeyan de qezenc kerd
Hewteyê 12. yê Trendyol Lîgê 1. de Batman Petrolsporî, keyeyê xo de Esenler Erokspor 3-2 mexlûb kerd.
Taximo meyman, deqaya 50. de bi golê Guélor Kangayî û deqaya 62. de bi golê Yusuf Erdoganî 2-0 vejîya vernî.
Temsîlkarê Batmanî, deqaya 69. de bi golê Metehan Mertî ferq ard yewî. Taximo sûr û sipî yo ke deqaya 85. de bi golo ke Pedrinhoyî penaltî ra qeyd kerd resa beraberîye, deqaya 90+2. de bi golê Mickaël Bironî maç 3-2 qezenc kerd.
Bi nê serkewtişî Batman Petrolsporo ke puanê xo vet 23î, Trendyol Lîgê 1. de ca girewt rêza çarine de.
Îdir FK yew puan peyê lîderî de yo
Alagoz Holdîng Îdir FKyî, Bandirmasporo ke deplasman de dir ame têrî 2-1 mexlûb kerd û taqîbê xo yê seba serê lîste domna.
Temsîlkarê Îdirî yo ke lîg de serkewtişê xo yo heştin girewt, puanê xo vet 26î.
Taximo kesk û sipî, dima netîceyanê hewteyê 12. peyê Bursasporo bi 28 puanan û Kayserîsporo bi 27 puanan de rêza hîrêyîne de ca girewt.
Îdir FKyî, 12 maçan de 8 serkewtişî, 2 seypêmendişî û 2 binkewtişî girewtî.
Vansporî deplasman de bi hîrê golan qezenc kerd
Hewteyê 12. yê Trendyol Lîgê 1. de Vansporo ke bi meymanê Bolusporî, warî ra 3-0 serkewte vejîya.
Golê taximo sûr û sîyayî deqaya 58. de penaltî ra Hîkmet Çîftçî, deqaya 72. de Îlkan Sever û deqaya 90+7. de Álvaroyî qeyd kerdî.
Bi na netîce Vansporo ke lîg de serkewtişê xo yo hîrêyin girewt, puanê xo vet 10î.
Temsîlkarê Wanî, peynîya 12 maçan de bi 3 serkewtişan, 3 seypêmendişan û 6 binkewtişan rêza 18. de ca gêno.
Vanspor, tevî serkewtişo bi ferq yo ke girewt zî nêeşka xeta warokewtişî ra bivejîyo.
Mêrdîn 1969 Spor ewro vejîyeno warî
Temsîlkarê Mêrdînî, ewro (26ê teşrîna verêne dişeme) saete 20.00 de do Manîsa FKyî bikero meyman. Maç do Stadyûmê Şaristanî yê 21ê Teşrîna Peyêne de bêro kaykerdene.
