Hefteyê 7. ê Lîgê Superî yê Trendyolî de Amedspor, ewro (10ê teşrîna verêne 2026 roja şeme) deplasmanê Anqara de do Gençlerbirliğî dir bêro têver. Maço ke do saete 13.30 de Stadyumê Eryamanî de dest pêbikero, do ekrananê beIN SPORTS 2î ra bêro weşanayîş. Badê mabênê ke seba maçanê millîyan ameybî dayîş, lîg newe ra dest pêkeno û Amedspor seba ke cayê xo yo lîderîye bipawa do vejîyo sahe.
Amedspor bi 13 puanan lîder o
Amedsporo ke bi serkewtişan dest bi sezonî kerd, mîyanê 6 hefteyanê verênan de bi 4 serketişan, 1 pîyayîye û 1 mexlubîyet 13 puanî top kerdî.
Wayîrê keyeyî Gençlerbirliği zî bi 7 puananê ke mîyanê 6 hefteyan de top kerdî, rêza 13. de ca gêno.
Maç do hetê Ümit Öztürkî ra bêro rayberdiş
Hakemê maçî do Ümit Öztürk bo. Mehmet Emin Tuğral û Kerem İlitangil do hetkarîya Öztürkî bikerê.
Gift Orban bi performansê xo dîqet anceno
Xeta hucûmî ya Amedsporî de Gift Orbanî, bi performansê ke mîyanê 6 hefteyanê verênan ê sezonî de mojna, dîqet anceno xo ser. Orbanî bi hewt golan û di asîstan pêro pîya seba 9 golan kede da
