Merkezê Heqanê Domanan yê Baroya Amedî, bi munasebetê 20ê teşrîna peyêne Roja Heqanê Tutan a Dinya bînaya baro de eşkerayîyêk da.
Serekê Baroyî Sertaç Buluttekîn û zaf avûkatî tewrê eşkerayîye bîy. Eşkerayî hetê Sereka Merkezê Heqanê Tutan Nursel Sariogluye ra ameye wendiş.
Nursel Sariogluye ard vîr ke pawitişê heqanê tutan wezîfeyo bingeyîn ê dewlete yo, bale ante binpaykerdişê heqanê domanan ser û nê waştişî rêz kerdî:
Perwerdeyê bi ziwanê dayîke: Ganî Tirkîya şerhê serê madeyanê 17, 29 û 30î yê Peymana Heqanê Domanan wedarno û heqê cuyê û perwerdeyê bi ziwanê dayîke bigîro binê temînatî.
Karkerîya domanan û feqîrîye: Ganî kedwerîya binê nameyê MESEMî de bêra qedênayîş û mekteban de seba heme domanan werdo rojane yê bêpere bêro dayîş.
Domanê ke prosesê dadwerîye de yê: Ma vera zêdekerdişê cezayan ê; ganî polîtîkayê pawitiş û piştdayîşê domanan bêrê averberdene.
Ewleyîya mekteban û dîjîtal: Ganî mektebî şîdetî ra bêrê paqijkerdene û domanî platformanê dîjîtalî ra bêrê pawitene.
Aştîya mende: Şerê ke dinya de yê, ser de Xeze de, tewr zêde zerar danê domanan; ganî seba domanan aştîyêka mende bêra awankerdene.
Nursel Sariogluye peynîya qiseykerdişê xo de veng da rayedaran û vat: “Ma veng danê heme sazîyanê elaqedaran ke çimanê xo binpaykerdişan rê nêpadê û wezîfeyê xo yê berpirsîyarîye bîyarê ca.”




