Bi paştîdayîşê Serekîya Daîreyê Weşîye, Kultur û Sporî ya Unîversîteya Dîcle û Weqfa Stêrka Bakurî, wendekarê Beşê Ziwan û Edebîyatê Kurdkî ameyî têhet. Çalakîye de kilamê dengbêjan ameyî vatene û wendekaran sohbet kerd û yewbînî şinasna. Wedekaran kitabê Zazakî zî ardî uca û dayîş şinasnayîş. Wendekaran kitabê J Îhsan Esparî ra zî çend şîirî wendî.
Çalakîye de wendekara sinifa didiyine ya Beşê Ziwan û Edebîyatê Kurdkî Nazli Yeşîlyaylaye derheqê beşê xo û perwerdeyê Zazakî de qisey kerd û cewab da persanê Zazakî Newsî.
Nazli Yeşîlyayla ke Bidlîs/Modan ra ya û çar serrî yo Amed de mamostatîye kena, vat ke aye par dest bi nê beşî kerdo. Yeşîlyaylaye îfade kerd ke a bi Dimilkî (Zazakî) bîya pîl la heta ke nêameya unîversîte nuştişê aye çin bi û vat: "Bi nê beşî ez hêdî-hêdî qaydeyê rasnuştişî musaya. Mi verê cû sey hobî dest bi nê beşî kerd la nika ez xo ser o yew bar û mesulîyet vînena. Wendişê nê beşî êdî seba mi yew karo mecbûrî yo ke ma xebatanê Zazakî bikerê zanistî û akademîk."
Nazli Yeşîlyaylaye veng da ciwananê zazayan û vat: "Çi heyf ke ma zazayî nê beşî de kêm ê. Ma wazenê ke hîna zaf xort û kêneyê zazayî bêrê nê beşî." Yeşîlyaylaye hemeyê mamostayanê xo rê zî sipasîya xo pêşkêş kerde.

Nazli Yeşîlyaylaye qiseykerdişê xo rê wîna dewam kerd: “
Mi par dest bi Beşê Ziwan û Edebîyatê Kurdkî kerd. Ez nika sinifa didiyine der a. No beş seba mi yew firsendo zaf weş o. Xora mi wendişî ra, edebîyatî ra zaf hes kerdêne. Ê, mi zî va no wendiş çira bi ziwanê mi mebo û mi dest bi ci kerd. Ez hema sinifa didiyine der a la nika ra nê beşî zaf çî da mi. Helbet ez bi Dimilî (Zazakî) bîya pîle. Ma heşt waye û birayî yê û ma heme, saya maye û pîyê xo de ma Dimilî zanenê û pê qisey kenê. Ez minetdara maye û pîyê xo ya ke ma bi Dimilî kerdî pîlî. La verê nê beşî nuştiş mi de çin bi. Mi tayê kursî girewtibî la ê zî bes nêbîyî. La bi nê beşî ez hêdî-hêdî qaydeyê nuştişî zî musaya. Û hema zî musena, rayîrê ma zaf derg o.
Ez wazena tayê zî pesnê nê beşî bida. Beşê ma lîsans o û çar serrî yo. Hem hetê ziwanî ra hem hetê edebîyatî ra zaf dersê ma estê. Unîversîteya Dîcle na babete de zî zaf biavantaj a. Mesela tayê unîversîteyî estê ke tena yew lehçe de perwerde danê; yan tena Zazakî yan zî tena Kurmanckî perwerde danê. La Dîcle de ti perwerdeyê xo bi Zazakî, Kurmanckî û Sorankî vînena. Farisî zî musena. Tena dersê ma yê ziwan û edebîyatî nîyê, dersê ma yê tarîx û folklorî zî estê.
Ma vacê yew wendekarî dest bi nê beşî kerd, do verênde çi bivîno?
· Ti sinifa yewine de hîna zaf bi ziwanî eleqedar bena. Rastnuştiş û açarnayîş musena. Rastnuştişê Zazakî û Zazakî de açarnayîş vînena. No seba Kurmanckî zî wina yo; gramera Kurmanckî û Kurmanckî de açarnayîş esto. Sinifa yewine de bi detayan nê dersê ma estê.
· Sinifa didiyine, hîrêyine û çarine de êdî dersê ma hîna zaf benê bidetayî. Mesela hetê ziwanî ra gramer kêm beno, êdî ti binbeşanê ziwannasîye vînena. Binbeşê ziwannasîye çi yê? Fonolojî, morfolojî, sentaks, semantîk… Ti êdî nê dersan vînena. Fonolojîya Zazakî, Morfolojîya Zazakî û Sentaksa Zazakî bi detayan vînena. Ez çira bi detayan vana, ez ey zî vaca. Mesela ma nika Fonolojîya Zazakî vînenê la tena yew fekî ser o yan zî yew herême ser o nê, heme herêmê ke tede zazayî estê ma înan ser o xebitîyenê. Sinifa didiyine de Sorankî zî esta.
· Hetê edebîyatî ra zî dersê ma benê bidetayî. Mesela verênde edebîyat çi yo, senîn kewto werte, ma nînan ser o vindenê. Badê, edebîyat zî beno edebîyatê klasîkî û modernî. No edebîyatê klasîkî û modernî zî goreyê tayê çîyan kategorîze beno. Mesela Îstanbul-Silêmanîye/Şam-Mehabad/Kafkasya/Dîyaspora… wina şino. Dersa ma ya wendişê metnan zî esta. Ma ê dersan de zî metnanê edebîyan wanenê û analîz kenê. Hem Zazakî hem Kurmanckî.
Beşê ma wina yo. Ez zaf keyfweş a ke mi dest bi ci kerd. Bi rastî mi sey hobî dest bi ci kerd la nika êdî hobî ra vejîya û ez xo ser o yew bar vînena. Ganî ma aver şêrê û xebatê Zazakî êdî bibê akademîk û îlmî. Wendişê nê beşî êdî seba mi yew hobî nîyo, yew karo mecbûrî yo. Ma wazenê ke hîna zaf wendekarî bêrê nê beşî. Ma zazayî çi heyf ke nê beşî de kêm ê; ma wazenê ke hîna zaf xort û kêneyê zazayan bêrê. Û ez wazena mamostayanê xo rê sipas bikera. Mamoste Pinar, Weysel, Murad, Zulkuf, Osman, Şerîf û hemeyan rê ma sipas kenê. Keyeyê înan awan bo. Bi xatirê şima.




