Cebbar Peşmeno 81 serrî yo nêweşê Alzaymîrî yo ke qezaya Bongilanî de cuyêne, 25ê teşrîna verêne keyeyê xo ra vecîya û reyna anêgêra. Dima ke merdimanê ey 28ê teşrîna verêne de îxbarê vîndîbîyayîşî da, hetê ekîbanê polîs û cendirmeyan ra xebata cigêrayîşî ame dest pêkerdiş.
Goreyê qeydanê kameraya asayîşî û îfadeyanê şahidanê hedîseyî ame tesbîtkerdiş ke Peşmen roja ke vîndî bîyo, bejrayîrê D-300î ser o wexto ke ver bi hetê dewa Elbaşîyî rayîr ra şîyêne ameyo vînayîş. Wexto ke xebatî ameyî hîrakerdiş, dewa Goksuyî ya qezaya Bongilanî de tirmê Peşmenî ame vînayîş. Dima cigêrayîşo ke ame kerdiş, cenazeya ey seba kare otopsî wedarîya morg.
