Wezaretê Perwerdeyî cewabê Parlamentera DEM Partî ya Colemêrgî Öznur Bartine da û amarê dersa weçînite ya kurdkî eşkera kerdî. Goreyê daneyan, 16 bajaran de 118 mamosteyê bi kadro, 24 mamosteyê bi peyman û 11 îdarekarî, pêro pîya 153 mamosteyê kurmancî û zazakî wezîfe kenê.
Parlamentera DEM Partî ya Colemêrgî Öznur Bartine, meclîs de derheqê astengîyanê vernîya dersa weçînite ya kurdkî (kurmancî û zazakî), kêmîya mamosteyan persname n dabî Wezîrê Perwerdeyî Yusuf Tekînî. Bartine persnameyê xo de bale antbî raporanê UNESCOyî ser ke Tirkîya de 15 ziwanî binê tehlukeyê vîndîbîyayîşî de yê û vatbî ke goreyê anketan se ra 98,7ê şarî perwerdeyê bi ziwanê dayîke wazeno. Bartine vatbî ke Tirkîya de 86 hezar û 64 wendekaran dersê kurmancî û kirmanckî (zazakî) weçînayê la rîyê çinbîyayîşê kitaban ra 16 bajaran de 321 mekteban de dersî bi fotokopîyan yenê dayîş û 14 bajaran de zî qet kitabêk nêameyo vilakerdiş.
Wezaretê Perwerdeyî yê Tirkîya bi rayîrê Serekîya Averberdişê Stratejî cewab da nê persan.
Seba 86 hezar wendekaran tenê 153 mamosteyî
Goreyê qeydanê fermîyan ê Wezaretê Perwerdeyî, serra wendişî ya 2026-2027î de mektebanê mîyanênan de seba sinifanê 5, 6, 7 û 8î pêro pîya waştişê 87 hezar û 607 kitabanê kurmancî û zazakî ameyo kerdiş. Wezaretî eşkera kerd ke her di zaravayanê kurdkî (kurmancî û zazakî) de 16 bajaran de 118 mamosteyê bi kadro, 24 mamosteyê bi peyman û 11 îdarekarî, bi temamî 153 mamosteyî wezîfedar ê.
Nê mamosteyan ra 118 kesî beşê kurmancî de û 35 kesî zî beşê zazakî de gureyenê. Nînan ra 122 kesî mektebanê mîyanênan de, 28 kesî merkezanê perwerdeyê şarî de, kesêk lîseya meslegî de û 2 kesî zî îdareyanê perwerdeyî de kar kenê. Wezaretî îfade kerd ke akerdişê sinifê dersa weçînite girêdayeyê şertê 10 wendekaran o û eke mamosteyê bi kadro çin bê, dersî hetê mamosteyanê mektebanê bînan yan zî mamosteyanê demkîyan (bi heqdest) ra yenê dayîş.
Meselaya kitabanê kurdkî
Wezaretê Perwerdeyî derheqê rexneyanê çinbîyayîşê kitaban de da zanayîş ke heta 28ê teşrîna verêne tena 50 hezar û 816 kitabî seba sinifanê 6, 7 û 8î ameyî çapkerdiş û vilakerdiş. Wezaretî sebebê ereymendişê kitabanê sinifê 5ine bi amadekarî û çape ra girê da û vat ke seba na sewîye 32 hezar û 234 kitabê kurmancî û 4 hezar û 517 kitabê kirmanckî (zazakî) ameyî waştiş.
Ame vatene ke dosyaya zazakî erey kewta çape û kitabê kurmancî yê sinifê 5ine zî rîyê amadenêbîyayîşê dosya ra nêameyo çapkerdiş. Reyna ame vatiş ke kitab tena 2yê teşrîna peyêne ya 2026î de torê EBAyî ser o ameyo weşanayene û xebatê çapkerdişê ey hîna dewam kenê.
Perwerdeyê bi ziwanê dayîke
Wezaretê Perwerdeyî beşê cewabê xo yo tewr muhîm de madeya 42yine ya Qanûnê Bingeyî vîr arde ke vana teberê tirkî de tu ziwanêk sey ziwanê dayîke nêyeno musnayene û perwerdekerdene
