Amedsporo ke Trendyol Super Lîg de micadeleyê lîderîye dano, emşo 7ê teşrîna peyêne de beno mêmanê lîder Galatasarayî. Maço ke Kompleksê Sporî yo Alî Samî Yen RAMS Park ê Îstanbulî de do bêro kaykerdene, saete 19.00 de dest pêbikero.
Lîg de temsîlkarê Amedî yo ke bi 23 puanan rêza diyîne de ca gêno, vera lîder Galatasarayo ke 25 puanê ey esto serkewtiş bigêro. Taximo kesk û sûr eke maçi qezenc bikero, do puanê xo biveco 26î û reqîbê xo peyê xo verdo.
Amedspor seba lîderîye vejîyeno seha
Amedsporo ke maçê xo yo peyên de Eyupspor 5-1 mexlûb kerdbi, deplasmanê Galatasarayî de bi hedefê hîrê puanan vejîyeno seha.
Temsîlkarê Amedî, 10 maçanê peyênan ê lîgî de bi 23 puananê ke arê dayê rêza diyîne de ca gêno.
Golcîyo nîjeryayij yo Amedsporî Gift Orban zî verê maçi bi 9 golan mîyanê kaykeranê tewr dîyaran ê taximî de ca gêno. Futbolbazo nîjeryayij yo Galatasarayî Victor Osimhenî zî 9 golî eştê; naye ra maç qiraltîya golan a nê di kaykeran bena yew babatanê tewr balkêşan ê nê maçi.
Maçê Galatasaray-Amedsporî do Halîl Umut Meler îdare bikero
Goreyê wezîfedarkerdişê hekeman ê hewteyê 11. yo Federasyonê Futbolî yê Tirkîya, têkoşînê mabênê Galatasaray û Amedsporî de do hekem Halîl Umut Meler fîtike bîyaro (maçî îdare bikero).
Goreyê agahîyanê roşitişê bîletan ê verê maçi, trîbuna deplasmanî ya ke seba terefdaranê Amedsporî ameybî abirnayene û qapasîteya aye 2 hezar û 496 kesî ya de, 2 hezar û 470 bîletî ameyî rotiş. Nîsbeta pirkerdene ya trîbuna deplasmanî resa sera 99î.
Maçê Galatasaray-Amedsporî kamcîn kanal de yo?
Goreyê eşkerakerdişa roja maçi ya ke hesabê fermî yo medyaya sosyale yê Amedsporî ra ameye weşanayene, têkoşîn do ekrananê beIN SPORTS 1î ra bi weşano ganî bêro dayîş
