Armen Demîrcîyano ke yew nameyo muhîm yê vîrê armenîyan ê Dîyarbekirî bi, cuya xo vînî kerd. Wefatê Demîrcîyanî hetê Endamê Heyetê Îdareyê Merkezî û Meclîsê Partîya DEMî, endamê Komîsyona Koçber û Multecîyan, nuştox û sîyasetmedaro armenî Murad Mıhçı ra ame îlankerdiş.
Armen Demîrcîyan kam o?
Armen Demîrcîyano ke nameyê ey yo nasname de Abdurrahîm Zorarslan o, 25 serrîya xo de musa ke armenî yo. Babîyê ey Agop (Habok) Demîrcîyan, wextê Terteleyê 1915î de hema çar serrî bi hetê yew keyeyê kurdî ra xelisya.
Dima ke Demîrcîyan tarîxê keyeyê xo musa, dest bi gêrayîşê kokanê xo kerd û resna merdimanê xo yê armenîyan ê Ewropa û Amerîka. Armenîkî musa û semedê kulturê armenîyan xebitya.
Demîrcîyanî demêk Dêra Armenîyan a Sûrp Gîragosî ya qezaya Sûrî ya Dîyarbekirî de zî wezîfe kerd. Dewranê reyna ganîbîyayîşê dêre de, bi yew parçeyê cuya komelkî û kulturîye.
Serra 2017î de wexto ke Dêra Sûrp Gîragosî ameybî xirabkerdene, bi eşkerayîyanê xo dej û xemgînîya xo ardîbî ziwan. Tarîxê dêre û estbîyayîşê komela armenîyan ê Dîyarbekirî, cuya ey de wayîrê cayêko zaf muhîm bî.
