Yewîtîya Meslegî ya Wayîranê Eseranê Muzîkî ya Tirkîya (MESAM) seba serra 40. ya ronayîşê xo musabeqaya bestayan a kurdkî do organîze bikero. Musabeqayo ke eşkerakerdişê çapemenîye yo bi beşdarîya Serekê MESAMî Recep Guven û Endamê Heyetê Îdareyî yê MESAMî Ferzînde Kaya ame îlankerdene de, eserê orîjînalî do bêrê erjnayene.
Musabeqaya bestayan a kurdkî ya ke heta tarîxê 30ê teşrîna peyêne muracatî yenê qebulkerdene, sey parçeyêkê musabeqaya pêroyî ya 11 şaxan ke muzîkê şarî ra heta rapî, tesewufî ra heta arabesk û muzîkê popî resena, do bêro viraştene.
‘Ma wazenê bestekaran bivisnê dest’
Serekê MESAMî Recep Ergulo ke kombîyayîş de qisey kerd, va ke na musabeqa Tirkîya de musabeqaya bestayan a kurdkî ya verêna ya ke hetê dezgehêko resmî ra yena organîzekerdene û qeyd kerd ke muzîkê kurdkî zaf zengîn o. Ergulî îfade kerd ke tabanê dayeyan ê MESAMî de bi mîlyonan repertûarî estê û mîyanê nînan de kurdkî zî bi hûmarêka berze ya eseran yena temsîlkerdene.
Sempozyûmê muzîkê kurdkî
Ergulî ard vîr ke înan demêk verê cû derheqê muzîkê kurdkî de yew sempozyûm viraştbî, va ke seba nê sempozyûmî zaf çîyî ameyî serê înan. Ergulî wina qisey kerd:
“Goreyê bingeyî felsefe û mantiqê hunerî de cîyatîya ziwan, dîn û nîjadî nêna kerdene. Bi vatena klasîke ma vanê huner unîversal o. Labelê mîyanê nê unîversalîye de, yanî wexto ke ewro ziwanêko ke bi mîlyonan, bi des mîlyonan însanî pê qisey kenê bibo, do bibo sebebê reaksîyonî? Tabanê dayeyan ê MESAMî de bi mîlyonan eserê kurdkî estê û nê welatî de bi hezaran muzîsyenê kurdî estê. Û nê însanî arenaya dinya de, tena bi nasnameyê xo yê kurdî nîyo, goreyê mi nê welatî de koka ey çi beno wa bibo, bawerîya ci çi bena wa bibo rîyê spî yo yê her kesî yê. Ganî her kes bi nînan serberz bo. Ganî her kes bi Mîkaîl Aslanî, bi Rojda, bi Şivan Perwerî serberz bo. Lazim o ke ma yewbînan cîya nêkerê. Ma zî hendê ke fekê ma gêno, xebityenê ke naye îzah bikerê.”
Serekê jurîyî Şivan Perwer o
Serekîya jurîyê musabeqaya bestayan a kurdkî Şivan Perwer keno, Delîl Dîlanar û Hakan Akay zî sey endamê jurîyî wezîfe gênê. Musabeqayo ke şaxê kurdkî de tewr zêde merdim eşkeno bi 2 eseran muracat bikero de, bestekarê profesyonel û amatorî yê ke 18 serrîya xo temam kerdê eşkenê beşdar bibê.
Seba hîrê eseranê verênan xelate
Musabeqayo ke heqê muracatî sey 500 TL ame dîyarkerdene de, şaxê kurdkî de xelata yewîneyî 50 hezar TL, xelata diyîneyî 40 hezar TL û xelata hîrêyîneyî zî 30 hezar TL do bibo. Heto bîn ra jurî eşkeno esero ke nezdîyê hîrêyîneyî yo sey Xelata Taybete ya Jurîyî bikero namzed. Seba aye zî 20 hezar TL xelate do bêro dayene.
Peyniya musabeqaya 11 şaxan de esero verên yo ke heqê xelate bivisno dest, do ‘Plakê Vîrardene yo Serra 40. yê MESAMî’ de ca bigêro. Eserê kurdkî zî mîyanê nê plakî de ca do bivînê. Heto bîn ra eser do hetê hunermendanê profesyonelan ra bêro vatene û seba eserî vîdeoklîb bêro antene. Notayê pêro eseranê ke derece girewto do kitabê “Musabeqaya Bestayan a Serra 40. ya MESAMî – Eserê ke Layîqê Xelate Ameyî Dîyene” de yo ke bi çapkerde û dîjîtal bêro weşanayene de ca bigêrê. Seba yewînanê 11 şaxan û esero ke Xelata Taybete ya Jurîyî girewto zî merasîmê xelatan û konserek do bêro organîzekerdene.
