Park çatrayîrê Bulwarê Mezopotamya û Bulwarê Diclekent ê qezaya Peyasî de yena awankerdiş û do bibo yew ê waranê pêdîyayîşî yê neweyan ê şaristanî. Projeyî de ke hetê Serekîya Daîreya Parkan û Baxçeyan ra yeno ramitiş, zemîno huşk, awankerdişo xam ê awanîyan û xetê awa lêmine, drenajî, awedayîş û roştî qedêyayî. Ekîbî xebatanê hûrdan, dekoratîfan û nebatkerdişî dewam kenê.
129 hezar metrekareyî sey warê keskî yeno rastkerdiş
129 hezar metrekareyê projeyî sey warê keskî, 30 hezar û 364 metrekareyê ci zî sey meydanî yenê rastkerdiş. Parke de rayîrê rayîrşîyayîş û vazdayîşî û warê fîtnesî est ê; 8 hezar darê cîya-cîyayî zî resayî herre ke îklîm û dorûverê Amedî reyde hemaheng ê.
Kultur, huner û cuya komelkîye do yew warî de biresê yewbînan
Parke de meydan, sînemayêka teberî ya 3 hezar metrekareyî, kitabxaneyêka teberî ya 982 metrekareyî, tesîsê komelkî, çîrr, rayîrê bîsîklet û rayîrşîyayîşî û warê kayê gedeyan do bibê. Seba gedeyan warêko 7 hezar û 968 metrekareyî ame cîyakerdiş. Warê gêrayîş û boyegirewtişî de di kafeterya, sê tuwaletî, odayê miqateyê gedeyan û di parkê erebeyan zî est ê.
Resayoxîya bêvindertiş esas ameye girewtiş
Dîzaynê parke de resayoxî ameye verênîyegirewtiş; ferqê kotî ameyî hewanayîş ke hemwelatîyê her emrî û her rewşa hereketî bi rehetî parke ra îstîfade bikerê. Rayîranê vazdayîş û rayîrşîyayîşî de reya verêne xalîya kerrayine ame xebitnayîş.
Mîmarê Peyzajî yê Serekîya Daîreya Parkan û Baxçeyan Nejdet Kaygisizî vat: “Ma ferqê kotî hewa da û modelêko resayoxîyo bêvindertiş girewt esas. Ma 8 hezar darê cîya-cîyayî resnayî herre ke şaristanê ma reyde hemaheng ê. Ma ser warêko hîna rehet û modern xebitîyenê ke hemwelatîyê ma bi rehetî wext tede bivîyarnê.”
