Sîyabend Sînan Karakaşo 25 serrî yo Dîyarbekirij, çarçewaya weçînayîşanê The Elite Model Turkeyî de mîyanê 150 modelan ra unwanê “Best Charm”î girewt. Karakaş keno ke musabeqayanê mîyanneteweyan de Tirkîya temsîl bikero.
Karakaşo 25 serrî va ke çar weçînayîşanê cîyayan de mîyanê 150 modelan ra kategorîyanê “Tewr Cazîbedar”, “Tewr Tesîrdar” û “Tewr Karîzmatîk” de ame erjnayene û unwanê “Best Charm”î girewto.
Karakaşî da zanayene ey heq qezenc kerdo ke çarçewaya Elite Model Worldî de tewrê weçînayîşanê ke do hîrê qiteyanê cîyayan ê dinya de bêrê viraştene bibo. O hedef keno ke şarê xo bi hawayêko baş temsîl bikero.
Serê tarîxê kurdan xebata akademîke rameno
Karakaşo ke pîya bi xebatanê modelîye perwerdeyê xo yo akademîk zî domneno, Enstîtuyê Ziwananê Ciwîyayoxan ê Unîversîteya Mêrdîn Artukluyî de warê Ziwan û Edebîyatê Kurdkî de lîsanso berz keno.
Karakaşo ke çarçewaya tezê lîsansê berzî de tarîxê kurdan ser o xebityeno, dima temamkerdişê perwerdeyê xo hedef keno ke Unîversîteya Sorbonneî ya Fransa de warê tarîxê kurdan de doktora bikero.
Amancê ey no yo ke rêzefîlmanê Netflixî de rol bigêro
Karakaşo ke eleqe mojneno kaykerîye zî, va ke xeyalanê ey yê tewr pîlan ra yew zî no yo ke rêzefîlm û fîlmanê platformê Netflixî de rol bigêro.
Karakaşî va ke eke firsend bêro dayene, eşkeno warê kaykerîye de performansêko serkewte bimojno û îfade kerd ke o wazeno modelanê ke warê mîyanneteweyî de yenê şinasnayene biyaro Dîyarbekir û Pirdo Desçimin yo tarîxî ser o yew aktîvîteya pîle ya moda organîze bikero.
