Dayîkê Aştîye yê ke bi waştişê eştişê gamanê zelalan ê çarçewaya Prosesê Aştîye û Komelo Demokratîk de 24 bajaran ra ameyî Enqere, Parkê Meclîsî de ameyî têhet.
Grûba ke pankarta “Seba aştîye game bierzê, Meclîs serê wezîfeyî rê” berz kerde, tîya de eşkerayîye daye. Çalakîye de bi kurdkî û tirkkî sloganî ameyî eştene.
Dayîka Aştîye Meryem Korkmaze va ke statuyê huqûqî yê Abdullah Ocalanî hema nêameyo şinasnayene û seba averşîyayîşê prosesî ganî game bêro eştene.
Korkmaze wina va: “Ma wazenê sozê ke ameyê dayene bêrê caardene û seba aştîye game bêro eştene. Ma her wext hetê aştîye de yê. Ma vindarnayîşê nê prosesî qebul nêkenê. Lazim o ke bi leze gamî bêrê eştene.”
“Heta ke aştî bêro temînkerdene ma nêvindenê”
Dayîka Aştîye Murwet Demîre zî va ke ê seba ke proses aver şêro ameyî Enqere.
Demîra ke va “Heta ke aştî bêro temînkerdene ma nêvindenê”, waşt ke seba bewlîkerdişê statuyê Ocalanî, veradayîşê mehpûsan û agêrayîşê ê ke mîyanê grûbanê çekdaran de yê gamî bêrê eştene.
Demîre va: “Ma seba nê tîya de yê.”
“Ma nêeşkenê bêeleqe bimanê”
Eşkerakerdiş de maya tegmenî Kezban Kalîne zî qisey kerd û paştî daye Dayîkanê Aştîye.
Kalîna va “Eke nê dayîkî aştîye wazenê, dima nê heme dejî ma nêeşkenê bêeleqe bimanê. Edalet seba her kesî lazim o.
