Pêvînayîşî Ozelî va ke ê do paştî bidê prosesê aştî, Bakirhanî zî seba paştdayîşê ke dayo sipas kerd.
Hemserekê Pêroyî yê Partîya Têduştîye û Demokrasî ya Şaran (Partîya DEMî) Tulay Hatîmogullari û Tuncer Bakirhan, pîya bi Wekîlê Serekê Grûbe Sezaî Temellî, Merkezê Pêroyî yê Partîya NEWÎ yo Enqere de yo de Serekê Pêroyî Ozgur Ozel dir ameyî têhet. Pêvînayîşî ra dima lîderanê partîyan beyanat da çapemenî.
Hemsereko Pêroyî yê Partîya DEMî Tuncer Bakirhano ke peyê pêvînayîşî qisey kerd, îfade kerd ke ganî partîyê sîyasîyî prosesê aştîye de berpirsîyarîye bigêrê xo ser û nê çîyî vatî:
“Pîya bi qanûnê çarçewaye ma kewtî dewêko newe; pawitişê her kesî no yo ke edî qanûno çarçewa bêro caardene. No proses tena yew proseso ke mîyanê di partîyan de rayra şino nîyo. Çunke prosesêko wina yo ke aştî û demokrasîya ma eleqedar keno, aye ra ganî partîyê sîyasîyî zî na babete de berpirsîyarîyêka pîle bigêrê xo ser. Na babete de Partîya Newîye tim rolekêko viraştox û pozîtîf kay kerd. Bi na wesîle ra ez wazena sipasîya xo pêşkêşê Birêz Serek Ozgur Ozel û îdareyo newe bikera.”
Serekê Pêroyî yê Partîya NEWÎ Ozgur Ozelî zî ser o vindert ke înan nêzdîbîyayîşo ke verê cû seba prosesê aştîye nawito nêbedilnayo û nê îfadeyî xebitnayî:
“Tirkîya de prosesê aştîye; qedîyayîşê terorî, veradayîşê çekan, peynîardişê pêkewtişan çîyêko xerên o. Tu keso ke nê erdan ser o cuyeno nê çîyan zîyan nêvêneno. No, seba yew zemîne yo ke her keso ke welat de cuyeno bi heme cîyatîyanê xo bi hawayêko birayane biciwîyo zaf muhîm o. Ma na noqta de helwêsta xo ya roca verêne ya ke ma vatbî 'Ganî merdim heto raşt yê tarîxî de ca bigêro', heta deqaya peyêne nêbedilna û ma na helwêsta xo reyna kenê.”
