Platformê medyaya dîjîtale Zazakî News, seba neqlkerdişê zazakîya ke binê tehlukeyî de ya yê neslanê neweyan, giranî daya tedeyanê anîmasyonî yê ke bi hişê viraşteyî hadre bîyê. Wexto ke vîdeoyê anîmasyonî yê zazakî yê ke seba gedeyan ameyê amadekerdiş eleqeyêko baş dî, platformî stratejîya weşangerîya xo ya dîjîtale de zêdêr ca da nê xebatan.
"Merheba embazê mi! Na dewa ma ya, na zî mangaya ma Belek a. Belek mergan de vaş wena û awa serdine şimena. Dima ra şito teze û sipî dana ma. Ez şitî ra zaf hes kena. Dayîka mi şitî ra ma ra mast, penîr, toraq û rûno kele virazena. Berxudar be Belek! Bimanê weşîye de! https://t.co/MEyf5qatdz
— Zazakî News (@zazaki_news) October 16, 2026
Seba gedeyan anîmasyonî
Zazakî News yo ke roja ronayîşê xo ra nata xeber, roportaj, meqale û podkastan virazeno, nê rojan de bi wasitayanê hişê viraşteyî seba tutan dest bi amadekerdişê vîdeoyanê anîmasyonî kerd. Koordînatorê Weşanî yo Pêroyî yê Zazakî Newsî Enver Yilmazî va ke nê tedeyê ke medyaya sosyale de yenê weşanayîşza feleqe dî û va:
“Man ê rojan de muhtewayê xo yê dîjîtalî kerdî cîya-cîya. Bi xebatanê sey podkastan, muhtewayê vîdeoyan, vateyê roje, vateyê verênan, nameyê çîyan û çekuya roje ma weşananê xo zengîn kerdî. Demo peyên de zî ma seba gedeyan amadekerdişê vîdeoyanê anîmasyonî yê bi hişê viraşteyî kerd. Nê muhtewayan zêdêr eleqe dî. Ma zî qerar da ke giranîye bidê nê warî.”
Ameyoxê ziwanî û teknolojîyê neweyî
Yilmazî îzah kerd ke teknolojîyê dîjîtalî pawitişê ziwananê binê tehlukeyî de firsendê muhîmî danê û bale ante kêmîya muhtewayê zazakî yê seba domanan ser.
Yilmazî wina qisey kerd: “Ewro domanî dinyaya dîjîtale de benê pîl. Anîmasyonî, vîdeoyê kilmî û muhtewayê dîjîtalî parçeyêko muhîm yê cuya înan a rojane yê. Labelê nê warî de muhtewayê zazakî zaf sinordar ê. Ma wazenê ke gedeyî bi ziwanê xo yo maye zî keyfweş bibê, bimûsê û bi zazakî dir têkîlîye rone. Aye ra ma teknolojîyanê hişê viraşteyî şuxulnenê û xebityenê ke zazakî seba gedeyan hîna asan, balkêş û rehetresaye bikere.”
Yilmazî ser o vindert ke neqlkerdişê mîyanê neslan yê zazakî de problemê cidîyî estê û nîsbeta qiseykerdişê zazakî ya gedeyan mîyanê cuya rojane de kêmî bîya û qiseykerdişê xo wina domna:
“Çi heyf ke ewro zaf gedeyî zazakî qisey nêkenê. Vajîyeno ke nîsbeta qiseykerdişê zazakî heta sera 15î kewta. No tablo, hetê ameyoxê ziwanê ma ra zaf fikardar o. Ma nêeşkenê sey seyrkeran verba vîndîbîyayîşê zazakîya ke ziwananê qedîman ê Mezopotamya ra yew a vindere. Wexto ke yew ziwan vîndî beno, tena çekuyî vîndî nêbenê; kultur, vîr û estbîyayîşê ke bi neslan ameyê neqlkerdene zî pêro vîndî benê. Ma bi îmkananê zaf kêmî seba ke zazakî dinyaya dîjîtale de hîna asaye bibo xebityenê. Amancê ma tena parekerdişê xeberan nîyo; eynî wext de amadekerdişê muhtewayan o ke domanî, ciwanî û neslê ameyoxî bi zazakî dir bêrê têhet. Zîrekîya viraştîye na babete de îmkananê neweyan dana ma. Ma wazenê ke nê teknolojîyan seba ciwînayîşê ziwanê xo bişuxulnê.”
