Murad Canşad
Ez domanîya xo de zaf neweş kewtêne. Mi zîyade ra serd girewtêne. Zimistan sobaya ma weş veşayêne. Kolîyê ma zaf bîyî. Wextê rakewtene de zerre sey firine bî. Ema wextêk ra pey soba bîyêne serdin, zerre bîyêne cemed. Mi serê şewdirî ra çimî akerdêne ke vengê mi birîyayo, xirrayiş gineno mi ver ro.
Raya şîfaxaneyî kewtêne para ma. Boya dermanan, hemşîrayî û kincê înan ê sipîyî…
Derzîne şanayêne bi mi. Hemşîrayêk bi şiringa ameyêne bi mi ser, gilê şiringa tîk kerdêne, nohet û ohet ra çarnayêne. Destereyo hurdî nayêne vileyê tuba dermanî ya camêne ro, kertik nayêne piro, qirç vatêne û sere şiknayêne. Sereyê şiringa cenayêne zerreyê tube ro, derman weantêne bi zerreyê ci. Çirtikî nayêne piro, hawaya zerreyê şiringa veng/tal kerdêne. Pîstonek tan dayêne, dermanê zerreyî vîçêk/binêk eştêne teber. Dermanî barî-barî fîjj dayêne, gilê derzîne ro dilopîyayêne bi erd. Dime ra ver çarnayêne bi mi, gilê derzîne şanayêne bi gepa qina mi.
Hemşîra no heme çî verê çimanê mi de kerdêne. Canê mi bîyêne cemed, bîyêne sey kemere. Sey ke mi benê verê kardî. Şîfaxane cayo xeşîm mebîyêne, ez ber ro yan zî bace ro rem-rem remayêne.
Dewe de eba derzîne şanayêne bi mi. Roca derzîne, mi dermanê xo girewtêne, ez şîyêne keyeyê înan. Yew qabê eba est bî. Şiringaya camêne û derzîne eştêne bi zerreyê ê qabî, awe kerdêne ser, dayêne adirî ser. Awe ke rinda-rind girîyaye; ê mîyan ra vetêne, bi paçê hekîmîye ziwa kerdêne. Şiringaya xo xeylê girs û qalind bîye. Derman weantêne bi zerreyê ci, verê çimanê mi de berdêne û ardêne. Ancî canê mi bîyêne cemed, ez kursîyî ser ro kud û kung mendêne. Tersê înanê keyeyî ra, ar û şerm ra mebîyêne, mi tum û tepeyî eştêne xo pey.
Şîfaxaneyan de, cayanê bînan de eynî çî ewro zî beno. Hemşîrayî verê çimanê domanan/qican de derzînan amade kenê. Qey înan ra no çîyêko normal o. Qey domanan/qican ra qet normal nîyo. Sey ke kardîya înan sane kenê.
Amadekerdişê derzînan ganî verê çimanê domanan/qican de mebo. Verê çimanê pîlan de zî mebo. Derzîne senî amade bena; neweşî wa qet mevînê. Wextê ci-şanayişê derzîne de verê domana/qican ohet ra biçarnîyo. Wa qet teba mevînê. Winî bizanê ke sey melhemî çîyêk beno canê înan ra.
Verênan seba nê çîyî tedbîr ronayo. Wextê sunet-kerdişî de kêrwa lacekî gêno pêşê xo, çiman nimneno, şeker erzeno bi fek. Çi bîyo, çi teba yo beno; doman/qic qet nêvîneno. Dorme de winî qisey kenê ke çîyêko normal ho beno. Cesaret danê domanî/qicî, ey goynenê. Biloyî(!) pîşenê, benê kenê mîyanê cilan. Pere û xelatan kenê binê berzînî ra. Doman/qic qet teba ferq nêkeno.





