Protokolo ke do panc serrî falîyet de bimano, hedef keno ke awanîya zafziwan û zafkulturî ya Mêrdînî xizmetanê weşîye de bêro nawnayene. Protokol hetê Mudirê Enstîtuyê Ziwananê ke Tirkîya de Cuyenê yê MAÜyî Prof. Dr. Ahmet Kirkanî û Mudirê Weşîye yê Bajarê Mêrdînî Dr. Saffet Yavuzî ra ame îmzakerdene.
Materyalê weşîye do bi ziwananê cîya-cîyan bêrê amadekerdene
Çarçewaya hemkarîye de bi kurmanckî, zazakî, erebkî, suryankî û ziwananê bînan ferhengê weşîye, lîsteyê termanê tibîyan, rayberê agahdarkerdişî yê nêweşan û materyalê vînayîş û eşnawitişî do bêrê amadekerdene. Goreyê xebera ke Mêrdîn Îletîşîm de ca girewta, muhtewayê ke bi piştîya akademîke ya unîversîte do bêrê viraştene, dima ke cigêrayîş û tesdîqê tibî yê Mudirîya Weşîye ya Bajarî ra ravêrê, dezgehanê weşîye de do bieşkê bêrê xebitnayene.
Bi nê xebatan yeno hedefkerdene ke hemwelatîyê ke ziwananê cîya-cîyan qisey kenê problemanê xo yê weşîye hîna rehet îfade bikerê, derheqê prosesanê tedawîye de biresê agahîya raşte û xizmetanê weşîye yê pawitoxan ra bi hawayêko hîna tesîrdar îstîfade bikerê.

Seba xebatkaranê weşîye perwerdeyê ziwan û komunîkasyonê mîyanê kulturan
Çarçewaya protokolî de seba personelê weşîye perwerdeyê hişyarîya ziwanî, komunîkasyonê mîyanê kulturan û komunîkasyonê nêweş-merkezî zî do bêrê organîzekerdene. Heto bîn ra serê babatanê wendiş-nuştişê weşîye, astenganê ziwanî û hîsgêrîya kulturîye de cigêrayîşê zanistî do bêrê kerdene. Yeno plankerdene ke her di dezgehî çarçewaya programanê sey TUBÎTAK, Ajansa Averşîyayîşî ya Dîcle (DÎKA), Yekîtîya Ewropa û Erasmus+î de projeyanê hemparan zî aver berê.
Kirkan: Ma do pêserîya xo ya akademîke hewcedarîyanê komelî dir bîyarê têhet
Mudirê Enstîtuyê Ziwananê ke Tirkîya de Cuyenê yê MAÜyî Prof. Dr. Ahmet Kirkanî îzah kerd ke xizmetanê weşîye de komunîkasyono raşt wayîrê muhîmîyêka heyatî ya û va ke ê hedef kenê zengînîya ziwanî ya Mêrdînî biaçarnê feydeyê komelkî.
Kirkano ke bale ante ser ke îfadekerdişo raşt ê hemwelatîyan û ronayîşê komunîkasyonêko weş bi xebatkaranê weşîye dir rasterast tesîr keno qalîteyê xizmetî ser, îfade kerd ke materyalê zafziwanî yê ke do bêrê amadekerdene hem hetê ziwanî ra hem zî hetê tibî ra do bêrê teyîdkerdene. Kirkanî qeyd kerd ke ê amanc kenê hemkarî bibo yew modelo dewamkar ke Mêrdîn de resayîşê xizmetanê weşîye asan keno.




