Seyîd Riza û embazê ey, serrgêra 89ine ya dardekerdişê xo de zaf bajaranê Kurdistanî û Tirkîya de yenê yadkerdene. Stenbol de zî Sazîyanê Elewîyan ê Stenbolî Îskeleyê Kadikoyî de programêko yadkerdişî viraşt. Yadkerdiş de ame waştene ke cayê mezelanê Seyîd Rizayî û embazanê ey eşkera bibo û arşîvî bêrê rakerdene.

Endam û rayberê sazîyanê elewîyan, parlamenterê DEM Partî yê Stenbolî Celal Firat, hemsereka DEM Partî ya Stenbolî Arîfe Çinar, aktîvîsta TJAyî Sabahat Tuncel, temsîlkarê partîyanê sîyasîyan û zaf kesî beşdarê bernameyî bîyî.

Yadkerdiş de pankartê “Cayê mezelanê Seyîd Rizayî û embazanê ey bêro eşkerakerdene” ame rakerdene û bi qurnefîlan “Dêrsim 1938” ame nuştene. Program, saete 19.37 de, semedê qurbanîyanê Dêrsimî bi yew deqîqeya sukûtî dest pêkerd.

‘Şima Nêeşkenê Tarîx û Têkoşînê Dêrsimî Biqedînê’

Dima eşkerayîye ameye dayene. Eşkerayîye, hetê endama Merkezê Cigêrayîşî yê Dêrsimî Semra Demîre ra ameye wendene. Semra Demîre vat ke 15ê Teşrîna Peyêne ya 1937î rojêka reşe ya û wina dewam kerd: “Emrê Seyîd Rizayî kilm kerd, emrê lajê ey zî gird kerd û darde kerdî. Bi hezaran kesan koç kerd, bi hezaran domanê Dêrsimî vîndî bîyî. 89 serrî vîyartî ke Seyîd Riza û embazê ey ardî dare. Hema zî rastîye nêvejîyaya, cayê mezelanê Seyîd Rizayî û embazanê ey nêzanîyeno. Waştişê ma yew o: gerekê cayê mezelanê Seyîd Rizayî û embazanê ey eşkera bibo. Şima nêeşkenê tarîx û têkoşînê Dêrsimî biqedînê.”

Stenbol De Seyîd Riza Û Embazê Ey Ameyî Yadkerdene1

‘Gerekê Arşîvê Dewlete Bêrê Rakerdene’

Eşkerayîye ra dima Sabahat Tuncele qisey kerd. Sabahat Tuncele vat ke eke welatêk de şarêk serê birîna xo de binalo, o wext aştîye û edalet senîn awan bibê û vat: “Merdeyê ma peyde nênê, derdê ma vîrê ma ra nêşinê, labelê edalet muhîm o. Gerekê ma tarîxî reyde rîbirî bimanê. Gerekê îqtîdar qanûnê uzirwaştişî vejo. Ewilî na hewce ya. Eke dewlete vana aştîye bena, gerekê arşîvê dewlete bêrê rakerdene. Birêz Ocalanî vat: ‘Ma meseleya kurdan dar ra arde masa ser.’ Coka gerekê ma xo organîze bikerê. Heta ke cayê mezelanê Seyîd Rizayî û embazanê ey nêvînê, têkoşînê ma do dewam bikero.”

86 hezar wendekaran tena 153 mamosteyê kurdkî: Kitabê Zazakî zî çîn ê!
86 hezar wendekaran tena 153 mamosteyê kurdkî: Kitabê Zazakî zî çîn ê!
İçeriği Görüntüle

Peynîye de girseyî qurnefîlê destê xo semedê aştîye û demokrasî eştî derya û program qedîya.