Ahmet Kayayî tew verî albumê “Ağlama Bebeğim” serra 1985î de weşanabi.
Dima xebatêka derge, albumo ke resa goşdaran, albumê “Acılara Tutunmak”î bi.
Kayayo ke qeydê albumê xo yê diyînî Studyoyê Degîşîmî de kerdî, bi wasitaya wayîrê studyoyî Sezer Bagcanî Gulten Hayaloglu r şinasîya.
Her di, dima weşanayîşê albumî zewicîyayî.

“Şafak Türküsü” resa girseyanê hîrayan
Gulten Hayalogluye, dima zewajê înan şîîra “Şafak Türküsü” ya şaîr Nevzat Çelîkî yo ke zîndan de bi waştişê cezaya mergî ameyêne muhakemekerdene, resna Ahmet Kayayî.
Esero ke Kayayî beste kerd, serra 1986î de weşanîya û hetê girseyanê hîrayan ra ame şinasnayîş.
Şikîyayîşanê tewr muhîman ê cuya Ahmet Kayayî ra yew, 11ê sibata 1999î de merasimê xelatan ê Komeleya Rojnamegeranê Magazînî de qewimîya.
Kayayo ke seba girewtişê xelata hunermendo tewr baş vejîya sehne, eşkera kerd ke albumo ke amade keno de do ca bido yew deyîra kurdkî.

Hunermendî qiseykerdişê xo de nê îfadeyî xebitnayî:
“Albumo ke ez nika amade kena û rojanê verê ma de do biweşana de, ez do yew deyîra kurdkî vaja û seba na deyîre do yew klîb bianca.”
Dima nê eşkerakerdişî Kayayo ke merasim de rastê reaksîyonanê tûjan ame, raya pêroyî de zî bi hawayêko xurt seu hedef ame mojnayîş.
Dima nê prosesî, Tirkîya ra bar kerd û şi paytextê Fransa Paris.
Paris de 43 serrîya xo de cuya xo vînî kerde
Ahmet Kayayî demo ke Paris de mendêne de xebatanê xo yê muzîkî domnayî.
Wexto ke qeydanê albumê “Hoşçakal Gözüm”î ser o xebitîyêne, 16ê teşrîna peyêna 2000î de krîzê qelbî derbaz kerd.
Hunermendî, 43 serrîya xo de Paris de cuya xo vînî kerde.
Kayayo ke cuyayîşê xo yê muzîkî de 22 albumî amade kerdî, dima mergê xo zî layîqê xelatanê cîya-cîyan ame dîyene.
Hunermendo ke bi deyîranê xo resa girseyanê hîrayan, pa 26 serranê ke vîyartê zî, Tirkîya de mîyanê nameyanê tewr zêde yadkerdeyan ê muzîko xas û protestî de ca gêno.




