Hunermendo Dêrsimij Huseyîn Guneş, bi xebata xo ya newîye “Beleke” goşdaranê xo dir ame têhet. Hunermendî îfade kerd ke muzîk tena yew deyîre vatene ra nêameyo meydan; va ke tayê deyîrî yenê goşdarkerdene û ravêrenê, la tayê kilamî zî kewenê zerîya merdimî û bi serran cuya xo rê dewam kenê.
Guneşî îfade kerd ke “Beleke” zî esero ke nê hîsan gêno xo ser o û da zanayene ke tayê kilamî e serran ra dima reyna yenê eşnawitene, yew dejî, hesretî, sewdayî, cografya û çîyê ke cuyayê anê vîrê merdimî.
Seba kedkaranê “Beleke” sipasî
Huseyîn Guneşî, kesê ke keda înan vejîyayîşê xebata “Beleke” de esta zî vîr ra nêkerdî.
Guneşî, Silêman Guzelo ke eser resna ey rê sipas kerd û Cem Çelebîyo ke rejîsorîya xebate girewte xo ser û bi sazanê xo paştî daye eserî rê zî bi taybetî sipasîya xo pêşkêş kerde.
Hunermendî heto bîn ra, produktorê xo Faîk Taşî yo ke xebatanê ey de her wext paştî daye ey û bitaybetî seba medyaya sosyale ardimê xo kêmî nêkerd, rejîsorê klîbî Hasret Ozcane rê û cînîya xo Songule ya ke antişê klîbî de ca girewta rê zî sipas kerd.
Xebata newîye ya hunermendê Dêrsimij Huseyîn Guneşî ya bi nameyê “Beleke”, heskerdayoxanê muzîkî dir yena têhet û goşdaran ra eleqeyêko baş vînena.
