Goreyê neqlkerdişê medyaya dewlete ya Îranî, dima ke Mehkemeya Berze cezaya mergî tesdîq kerde, Alî Sîna Mostafavîyo ke peyê çalakîyanê vera rejimî ameybî tepiştene, ewro şewdir ame îdamkerdene.
Muzîsyen û kogêr
Dezgehê komelê sivîlî yo îranij Tavaana ke merkezê ci Amerîka de yo eşkera kerd ke Mostafavî yew muzîsyen û kogêro profesyonel bi û menga çeleyî de tewrê protestoyanê vera hukmatî bîbî. Heto bîn ra dadgerîya Îranî, Mostafavî bi îdîaya “vera Homayî ceng akerdene” zî tede zaf hêrişan ra berpirsîyar dînayene û cezaya mergî ca arde.
Ame neqlkerdene ke vîzêr Mostafavî Zîndanê Şehabî yê Kirmanî de neqlê hucreya yewkesî bîyo û selahîyetdaranê zîndanî seba tertîbkerdişê pêvînayîşêko peyên keyeyê ey dir têkîlî naye.
Tewr tay 34 kesî ameyî îdamkerdene
Goreyê agahîyanê Rêxistina Heqanê Merdiman a Îranî (IHRNGO) ya bi merkezê Norweçî û Rêxistina Efûyî ya Mîyanneteweyî, 19ê adare ra nata girêdayeyê protestoyanê menga kanûna 2025î û çeleya 2026î, tewr tay 34 kesî ameyî îdamkerdene.
