Goreyê neqlkerdişê rojnameyê Le Mondeî, hereketa ke herêma Parisî de dest pêkerde, vilayê pêro welatî de bîy. Wendekarî vera sinifanê qelebalixan, dersanê vengan ê ke herinda înan de mamostayî nênê tayînkerdiş, programanê giranan ê dersan û tedaya ke sîstemê Parcoursupî (yo ke derbazbîyayîşê unîversîte de yeno xebitnayîş) vejîyenê. Rêxistinê wendekaran heto bîn ra seba lîseyan abirnayîşê çimeyê 10 mîlyar euroyî wazenê.
Serekkomar Emmanuel Macronî zî veng da ke wa çalakîyî bi hawayêko sakin, biserûber û bê ke zîyan biresîyo kesan ya zî malê pêroyî rê bêrê viraştiş.
Paris de ame plankerdeiş ke rayşîyayîşê wendekaran saete 16.00 de Place d’Italie ra dest pêbiko û ver bi Invalides aver şêro. No guzergah, yew noqtaya nezdîya Serekwezîrîye û Wezaretê Perwerdeyî yê Neteweyî de qedîyeno. Medyaya sosyale de zî seba numayîşêko bîn yo ke yeno plankerdiş bînaya şaredarî ra ver bi Matignonî bêro kerdene, vengdayîşêk dîya.
Rêxistinê wendekaran wazenê ke beşdarê protestoyanê girantîya cuyî zî bibê yê ke ameyê plankerdene ke roja şemeyî bêrê viraştene. Bi nê hawayî yeno hedefkerdene ke waştişê derheqê sîstemê perwerdeyî, îtîrazanê seba şertanê ekonomîkî yê ciwanan dir bêrê yewkerdiş.
Goreyê Wezaretê Karanê Zereyî, roja verêne ya protestoyê girdî yê 6ê teşrîna verêne pêro welatî de 266 hezar kesî vejîyayî kuçeyan. Organîzatoran zî beşdarîye sey 450 hezarî eşkera kerde. Protesyoyanê 8ê teşrîna verêne de hûmara ke wezaretî dabî 71 hezar û 500 bîy. Goreyê çimeyanê polîsî ke ajansa xeberan a Fransa AFPye neql kerdo, yeno pawitene ke seba çalakîyanê 13ê teşrîna verêne 130 hezar heta 200 hezar kesî beşdar bibê.
