Serekê Herêma Kurdistanî Nêçîrvan Barzanîyî, Hemserekê Pêroyî yê Partîya DEMî Tuncer Bakirhan qebûl kerd. Pêvînayîş de, prosesê aştîye yo ke Tirkîya de dewam keno û averşîyayîşê peyênî yê ke proses de qewimîyayî ameyî erjnayîş.
Goreyê eşkerakerdişê Serekîya Herêma Kurdistanî, pêvînayîşo ke roja sêşemeyî virazîya de seba serkewtişê prosesê aştîye gamê ke ganî bêrê eştene ameyî dest girewtiş.
“No firsendê tarîxî ganî nêro remnayene”
Eşkerakerdişê derheqê muhtewaya pêvînayîşî de ame vatiş ke hetî, seba temînkerdişê aştîye ganî firsendê tarîxî yo mewcud bêro erjnayîş, na babete de bîyê hemfikir.
Eşkerakerdiş de ame vatiş: “Her di hetan zî seba temînkerdişê aştîye muhîmîya erjnayîşê nê firsendê tarîxî ard ziwan û reyna va ke ganî no firsend nêro remnayîş. Heto bîn ra îşaret kerd bi gerektîya paştdayîşê pêro hetan seba prosesî.”
Nêçîrvan Barzanîyî ra seba prosesî mesajê paştdayîşî
Eşkerakerdişo ke tede yeno îfadekerdiş Serekê Herêma Kurdistani Nêçîrvan Barzanîyî paştdayîşê xo yê seba prosesê aştîye reyna kerd, ame qeydkerdiş ke Barzanîyî îfade kerdo seba ke proses bireso serkewtişî, o hazir o her tewir ardimo ke lazim o peyda biko.
Ame neqlkerdene ke Barzanîyî heto bîn ra bala xo daya ser ke aştîye hetê asayîş û îstîqrarê Tirkîya û pêro herême ra çiqas muhîm a.
Bakirhanî ra Barzanîyî rê sipasî
Ame vatiş ke, Hemserekê Pêroyî yê Partîya DEMî Tuncer Bakirhanî zî, seba paştdayîşê prosesî û xebatanê înan, Neçîrvan Barzanîyî rê sipas kerdo.
Goreyê eşkerakerdişî Bakirhanî, nameyê Partîya DEMî ra, seba teşebusê Barzanîyî ke paştî dano prosesî û teşebusanê ey ê ke dewam kenê memnunîya xo ard ziwan.
