Resul Yıldırım
Hey Raywano! Eno dejê şîyayîşê zerrîya to yo. Zerrîya reşbeleke ke ne dermanê ci est o ne zî tedawîya ci. Eno dejo xidar, eno dejo bêbin, eno dejo çarçetal, axxx! çi yemano eno dej, sey nêweşîya xirabe yo, sey nêweşîya ke zere ra zere merdimî wena, qedênena.
Hey Raywano! Rîyê to de dejê zerrîya to ya bêçare, zerrîya to ya binalenale, rîyê to de dejê zemanî asîyeno. Dejê to barê enê çaxê zurekerî yo. Barê to barê heme babîyan û heme dadîyan o.
Hey Raywano! Şo. Wa şîyayîşê to roşn bikero zerrîyanê tarîyan, wa ganî bikero hîsanê merdeyan û wijdananê koran. Şo! Seba Narîna xo ya sey gula henare ke qerefîyayî gilanê xo ra û qerefîyayî vereka to ra.
Hey Raywano! Ti qurbanê reytîngê qenalan û xezeteyan î. Qurbanê zuran û zurkeran î. Seba Narîna xo ya delale bierze her game û verba heme neheqîyan. Her gamê to yew xençer her gamê to yew heqîqet û tîş biker sîneyê medyaya zureker.
Hey Raywano! Raywano zerrîşikte û nîmcet ma şahîdê û ma şahîdî kenê ke êdî însan sey yew vergî vêyşan û bêmerhemet o. Keyneka to qurbanê însananê wehşîyan bîye û eno çaxo ke çerxê ci metal ra yê û her çi bikewo fek sey yew patose texneno, şima zî texnayî. Şima qurbanê reytîngan û xezeteyan û fenomenîya însanan bîyê.
Hey Raywano! Hema çi Narînî ameyîkiştiş ke ne yewî dî ne zî yew pêhesîya, çi Gulistanî çi Rojînî. Qanun, eno zemano ke zerrîya ey helesîyaya de tim hetê serdestan keno û tim înan ro xizmetkar o. Rîyê qanunan o lexnet tim xo naweno şarî la rûnê qanunan tim nanê ê zerrîkoran ser o yo.
Hey Raywano! Rayîrê to mubarek bo. Însan rayîranê bitelîyan û bizehmetan ra seba armancanê birumetan şino. Ti seba heqîqeta ke ti ci ra bawer kenî şo la bizane ke êyê ke ti vengê înan danî, ti wazenê vengê xo biresnî înan hetê wijdan ra merde, hetê zerrî ra kor û hetê însanîyet ra zî wehşî yê.
10.10.2026
