Merasîm hetê KESK, DÎSK, TTB, TMMOB û Komeleya Aştîye ya 10ê Teşrîna Verêne ra ame organîzekerdiş. Merasîm de 103 kesî ameyî vîrardiş; nê kesî 10ê teşrîna verêna 2015î de hêrişê DAÎŞ’î yê vera Mîtînga Ked, Aştî û Demokrasî de ameybî kiştiş. Verê merasîmî kome verê Metroya Ulusî de amê têhet û bi rayîrşîyayîşêk bêveng ver bi Garê Ankara şîyê. Hemsereka Pêroyî ya DEM Partî Tulay Hatimogullari, Serekê Pêroyî yê Partîya YENÎ Ozgur Ozel û zaf temsîlkarê partî û rêxistinanê komelî tewrê rayîrşîyayîşî bîyî. Saete 10.04î de, wexto ke qirkerdiş qewimîyabî, seba kişteyan deqeyêk rêzegirewtiş ame kerdiş.
‘Merheleyêk tarîxî’
Sereka Konseyê Merkezî yê TTB’yî Pinar Saipe eşkerayîya hempare ya dezgehan wende. Saipe îfade kerd ke qirkerdiş hêrişêk bî vera aştî, demokrasî û kedî û wina vat: “Welatê ma ewro seba qedênayîşê pêkewtişêk ke des serran dewam kerdo, reyna verê merheleyêk tarîxî de yo. Ma gamanê ke seba caverdayîşê çekan û vindarnayîşê pêkewtişan yenê eştiş, seba îstîqbalê demokratîkî yê welatê xo muhîm vînenê. La ma rind zanenê ke aştîya raştikêne û daîmîye tena bi bêvengbîyayîşê çekan nêbena. Prensîbo bingeyên yê ILO’yî vano: ‘Aştîyêk gerdûnî û daîmî tena bingeyê edaletê komelkî ser o eşkena bêro awankerdiş.'”
‘Ganî proses bi îradeyê heme beşanê komelî bêro ramitiş’
Pinar Saipe vat ke aştîya daîmîye bi sîyasetê înkar û emnîyetî ney, bi sîyasetê demokratîk, hemwelatijîya seyyewbînîye û heqanê bingeyênan mumkun a: “Aştî tena sey meseleyêk emnîyetî nêeşkena bêro dîyayîş; aştî prosesê awankerdişê komelêk demokratîk û seyyewbînî yo. Ganî no proses heme beşanê komelî bigîro xo mîyan û bingeyê îradeyê înan ser o bêro ramitiş.”
‘Edalet nêameyo ca’
Saipe dîyar kerd ke 11 serran de ke qirkerdişî ra nat vîyartî, înan seba edaletî têkoşîn kerdo: “Muhakemeyan de tayê sucdarî ameyî cezakerdiş zî berpirsîyarê bingeyênî yê peyê nê qirkerdişî yenê pawitiş. Heme melumatanê îstîxbaratî reyde zî kesê ke tedbîrî nêgirewtî, îhmalê burokrasîya emnîyetî û kêmanîyê kontrolî nêameyî eşkerakerdiş. Berpirsîyarê raştikênî nêameyî muhakemekerdiş; dewaya 10ê Teşrîna Verêne de edalet nêameyo ca. Çîyo tewr giran no yo ke îqtîdarê sîyasî badê qirkerdişî xeletî û berpirsîyarîya xo red kerdî.”
‘Ganî heme berpirsîyarî bêrê eşkerakerdiş’
Saipe peynî de wina vat: “Aştî ma rê tena yew slogan nîya; waştişê ma yê cuya seyyewbînî, azad û pîyayî ya. Ma qet têkoşînê xo ra fek veranêdanê; ganî heme berpirsîyarê qirkerdişî bêrê eşkerakerdiş û heme karmendê pêroyî yê ke îhmal kerdo bêrê muhakemekerdiş. Ma do bê şik Tirkîyayêk awan bikerê ke ked, aştî û demokrasî tede serdest bê.” Badê eşkerayîye verê Abîdeyê “Qîrîna Dayîkanê 10ê Teşrîna Verêne” qerenfîlî ameyî ronayîş.
