Suera ke Antalya de cuyêne, hetê polîsan ra bi wasitaya keyeyê aye ameye gêrayîş û ame agahdarkerdiş ke derheqê aye de qerarê tepiştişî esto û seba muameleyê îmzaye ganî şêra edlîye. Suera ke şîye Edlîyeya Antalyaya, tîya de ameye tewqîfkerdene û şawîya Dezgehê Caardişê Cezayan ê Girewte yo Tîpê L yê Antalyaya.
Avûkatê Suere dîyar kerd ke hema mudetname nêresayo înan û derheqê çend wext zîndan de bimano de wayîrê agahîye nîyê.
Seba gerreya qeyûmî dewa ameybî akerdene
Sadîye Suera ke weçînayîşanê herêmkîyan ê serra 2014î de lîsteya Partîya Aştî û Demokrasîye (BDP) ra sey Hemsereka Şaredarîya Pasûrî ameybî weçînayene, seba qiseykerdişo ke dewrê wezîfeyê xo de kerdbî, derheqê aye de dewa ameybî akerdene.
Dewaya ke Mehkemeya Cezaye ya Esliye ya Pasûrî de ameye vînayene de Suere rê, bi îdîaya heqaretkerdişê Serekkomar Erdoganî 2 serre û 6 mengî cezaya hepisî ameybî dayene.
Dewa, seba gerreyê qaymeqamê Pasûrî yê ê wextî Fatîh Dûlgerogluyo ke herinda Serekê Şaredarî yo DBPyij Metîn Dînarî yo ke wezîfe ra ameybi dûrvistiş de sey qeyûm ameybi tayînkerdene, ameybî akerdene. Dûlgerogluyî îdîa kerdbi ke kombîyayîşê meclîsê şaredarîye de Suere destê ey nêgirewto û seba Serekkomar Erdoganî îfadeyê “munafiq”î xebitnayo.
Verê cû zî 9 serre û 2 mengî cezaya hepisî dabî aye
Suera ke 5ê çeleya 2017î de hetê Wezaretê Karanê Zereyî ra wezîfe ra ameybî girewtene û herinda aye de qeyûm ameybi tayînkerdene, nê prosesî de ameybî tepiştene.
Derheqê Suere de heto bîn ra bi sûcdarîyanê “endamîya rêxistina terorî” û “propagandakerdişê rêxistina terorî”, dewayanê ke Mehkemeya Cezaya Girane ya 8. a Dîyarbekirî de ameybî akerdene de pêro pîya 9 serre û 2 mengî cezaya hepisî ameybî dayene.
Suere, dima ke pakêtê reformê dadgerîye yo newe bi qanûn, 2yê teşrîna peyêna 2019î de ameybî texlîyakerdene (veradayene).
