Partîya DEMî, şaredarîyan seba xizmetanê ziwanê maye gamêka newîye eşte. Waşt ke seba ronayîşê serekîya dayîreyî ya şaredarîyanê şaristananê girdan û mudirîyeya şaredarîyanê bajar, qeza û beldeyan muracato resmî seba wezareto eleqedar bêro kerdene.
Heyetê Îdareyanê Herêmkîyan ê Demokratîkî yê Partîya DEMî, seba caardişê qeraranê ke konferansê îdareyanê herêmkîyan yo 8-9ê hezîrana 2026î de ameybî girewtene, şaredarîyan rê agahîname şawit.
Agahîname de ame waştene ke şaredarîyî, seba ke xebatanê xo yê warê ziwanê maye biresnê awanîyêka dezgehkîye, muracatê Wezaretê Dorûver, Şaristanawanî û Vurîyayîşê Îqlîmî bikerê.
Şaristananê girdan de ronayîşê serekîya dayîreyî do bêro waştene
Goreyê xebera MAyî, şaredarîyê şaristananê girdan seba ronayîşê “Serekîya Dayîreyê Ciwînayîş û Averberdişê Ziwanan” wezaretî rê nuşteyo resmî bişawê. Şaredarîyê bajar, qeza û beldeyan zî seba awankerdişê “Mudirîya Ciwînayîş û Averberdişê Ziwanan” do muracat bikerê.
Na çarçewa de telîmat dîya şaredarîyan ke nuşteyanê xo yê resmîyan biresnê wezareto eleqedar û seba destpêkerdişê prosesê huqûqî game bierzê.
Xizmetê ziwanê maye do dewam bikê
Agahîname de ame dîyarkerdene ke wexto ke prosesê huqûqî yê derheqê viraştişê mewzûatî de dewam kenê, ganî şaredarîyî xizmetanê xo yê mewcudan ê warê ziwanê maye bidomnê.
Şaredarîyan ra ame waştene ke bê ke prosesanê muracat û vurîyayîşê mewzûatî bipawê, wa mabên nêdê xebatanê xo yê nê warî de.
